Psalms 55— AFR20

¹Vir die •musiekleier. Met snarespel. 'n Maskiel. Van Dawid.

²O God, luister na my gebed, verberg U nie vir my smeekbede nie.

³Luister tog aandagtig na my en antwoord my. Klaend dwaal ek rond; ek is verward

⁴oor die geraas van vyande, oor die getier van goddeloses, want hulle laat onreg op my neerstort, en in toorn is hulle vyandig teenoor my.

⁵My hart krimp ineen in my binneste, doodsangs het my oorval.

⁶Vrees en bewing oorweldig my, 'n rilling trek deur my liggaam.

⁷Ek het gedink, het ek maar vlerke gehad soos 'n duif! Ek sou wegvlieg en 'n tuiste vind;

⁸ja, ek sou ver weggaan om te ontvlug; ek sou in die woestyn oornag.

⁹Ek sou haastig vir my 'n skuilplek soek, weg van die rukwind, van die hewige storm.

¹⁰My Heer, verwar, verdeel hulle tonge, want in die stad sien ek net geweld en stryd.

¹¹Dag en nag doen dit die rondte op die stadsmure, en binne die stad is daar onreg en geweld.

¹²Vernietiging is binne-in die stad, verdrukking en bedrog wyk nie van die stadsplein nie.

¹³Dit is immers nie 'n vyand wat my uittart nie – ek sou dit nog kon verduur; dit is nie my hater wat selfvoldaan is teenoor my nie; ek sou my vir hom kon versteek.

¹⁴Maar dat dit jy is, 'n mens soos ek, my boesemvriend en vertroueling –

¹⁵ons wat vertroulike gesprekke saam geniet het terwyl ons in die huis van God loop in die gedrang van mense!

¹⁶Mag die dood hulle onverhoeds betrap, mag hulle lewendig afdaal na die •doderyk; want boosheid is by hulle tuis, dit is in hulle midde.

¹⁷Ek, ek roep tot God, en die Here sal my verlos.

¹⁸In die aand, in die oggend en in die middag het ek gekla en gesteun; maar Hy het my stem gehoor.

¹⁹Met vrede koop Hy my lewe vry van 'n geveg wat teen my gerig is, al is hulle in hulle hordes teen my.

²⁰God hoor en sal hulle verneder – Hy regeer immers van die voortyd af, – hulle by wie daar geen verandering is nie, en wat nie ontsag het vir God nie.

²¹Teen sy vriende het hy sy hand uitgesteek; hy het sy verbond geskend.

²²Sy mond is gladder as botter, maar sy hart is die ene oorlog. Sy woorde is strelender as olie, maar dit is ontblote swaarde.

²³Werp jou las op die Here; Hy sal jou versorg, Hy sal nooit toelaat dat die regverdige wankel nie.

²⁴U, o God, laat hulle afdaal in die put van die graf. Die manne van bloed en bedrog haal nie eers die helfte van hulle jare nie. Maar ek, ek vertrou op U.