Psalms 113— AFR20

¹Halleluja! Loof, diensknegte van die Here, Loof die Naam van die Here.

²Mag die Naam van die Here geprys word, van nou af tot in ewigheid.

³Mag, van waar die son opkom tot waar dit ondergaan, die Naam van die Here geloof word.

⁴Hoog bo al die nasies is die Here; bo die hemel is sy heerlikheid.

⁵Wie is soos die Here, ons God, wat hoog woon,

⁶wat laag afkyk op die hemel en die aarde –

⁷Hy wat hulpeloses uit die stof laat opstaan, van die ashoop af behoeftiges verhef

⁸om hulle by vooraanstaandes te laat sit, by die vooraanstaandes van sy volk,

⁹Hy wat aan die onvrugbare vrou van die huis 'n tuiste gee – 'n gelukkige moeder van kinders. Halleluja!