Lamentations 3— AFR20

¹Ek is die man wat ellende beleef het deur die slae van die Here se gramskap.

²Hy het my gedryf, my in die donker laat loop, sonder lig.

³Ja, Hy het sy hand teen my gelig, telkens weer, die hele dag.

⁴Hy het my vleis en vel verteer, my bene gebreek.

⁵Hy het my beleër, my omring met bitterheid en moeite.

⁶Hy het my in donker plekke laat bly soos dié wat lankal dood is.

⁷Hy het 'n muur rondom my gebou, uitkom kan ek nie; Hy het my boeie van brons swaar gemaak.

⁸Selfs al skree ek en roep om hulp, sluit Hy Hom af vir my gebed.

⁹Met gekapte klip het Hy my pad toegebou, Hy het my paaie laat kronkel.

¹⁰Hy is 'n beer wat my voorlê, 'n leeu in skuilplekke.

¹¹Hy het my paaie verlê, my braak laat lê, my 'n woesteny gemaak.

¹²Hy het sy boog gespan, my as teiken opgestel vir die pyl.

¹³Die pyle uit sy koker het Hy in my niere laat indring.

¹⁴Ek word uitgelag deur al my mense; hulle spotlied klink heeldag op.

¹⁵Met bitter kruie het Hy my versadig, my in oormaat wildeals laat drink.

¹⁶Hy het my tande op gruis laat afslyt; Hy het my in die as vertrap.

¹⁷Vrede is my ontneem, die goeie het ek vergeet.

¹⁸Ek het gesê: My toekoms en my hoop op die Here het verdwyn.

¹⁹Dink aan my nood en my swerwersbestaan, aan die wildeals en gif.

²⁰Wanneer ek diep daaroor nadink, raak ek terneergedruk.

²¹Dít roep ek in herinnering, daarom het ek hoop:

²²Dit is deur die troue liefde van die Here dat ons nie omgekom het nie, ja, sy ontferming ken geen einde nie.

²³Dit is elke oggend weer nuut – groot is u getrouheid.

²⁴My erfdeel is die Here, sê ek; daarom hoop ek op Hom.

²⁵Goed is die Here vir hulle wat op Hom wag, vir die mens wat na Hom soek.

²⁶Goed is dit om stil te hoop op die verlossing van die Here.

²⁷Goed is dit vir 'n jong man om 'n juk in sy jeug te dra.

²⁸Hy moet alleen sit in stilte, want die Here het dit op hom gelê.

²⁹Hy moet maar sy gesig in die stof hou; miskien is daar hoop.

³⁰Hy moet sy wang draai na dié wat hom slaan; laat hy versadig word van skande.

³¹My Heer verwerp beslis nie die mens vir ewig nie;

³²maar as Hy iemand bedroef het, ontferm Hy Hom met die volle omvang van sy troue liefde.

³³Hy verdruk en bedroef mensekinders teen sy sin.

³⁴Dat al die gevangenes van die aarde vertrap word;

³⁵dat die reg van 'n mens voor die Allerhoogste geskend word;

³⁶dat enige mens se regsaak verydel word – sien my Heer dit nie?

³⁷Wie sê iets en dit gebeur as my Heer dit nie gebied het nie?

³⁸Kom sowel die goeie as die slegte nie uit die mond van die Allerhoogste nie?

³⁹Wat kla 'n mens terwyl hy nog leef, 'n jong man oor die straf op sy sonde?

⁴⁰Laat ons ons handelswyse ondersoek en toets, en laat ons na die Here terugkeer.

⁴¹Laat ons ons harte saam met ons hande ophef na God in die hemel.

⁴²Ons het oortree; ons was opstandig. U het ons nie vergewe nie.

⁴³U het U in toorn gehul en ons agtervolg; U het genadeloos doodgemaak.

⁴⁴U het U afgeskerm met 'n wolk waardeur geen gebed kan dring nie.

⁴⁵Uitvaagsels en vullis het U ons gemaak onder die volke.

⁴⁶Al ons vyande het hulle mond vol oor ons.

⁴⁷Angs en afgrond het ons lot geword, verwoesting en ineenstorting.

⁴⁸Uit my oë vloei strome water oor die ineenstorting van die dogter van my volk.

⁴⁹Sonder onderbreking, sonder einde, bly my trane loop,

⁵⁰totdat die Here uit die hemel neerkyk en dit sien.

⁵¹Hoe pynlik om al die dogters van my stad so te sien!

⁵²Verbete en sonder rede het my vyande my soos 'n voël gejag.

⁵³Hulle het my lewe in 'n opgaarput uitgedoof en klippe op my gegooi.

⁵⁴Die water het tot oor my kop gestyg en ek het gedink ek is verlore.

⁵⁵Ek roep u naam, o Here, uit die diepste put.

⁵⁶U het my stem gehoor. Moet tog nie u ore sluit vir my geroep om uitkoms nie.

⁵⁷U het na my toe gekom op die dag toe ek na U geroep het. U het gesê: “Moenie bang wees nie.”

⁵⁸U, my Heer, het my regsaak behartig; U het my lewe gered.

⁵⁹U, Here, het die onreg wat my aangedoen is, gesien; lewer 'n regverdige uitspraak oor my.

⁶⁰U het al hulle wraakgierigheid gesien, al hulle planne vir my.

⁶¹U het hulle uittarting gehoor, Here, al hulle planne teen my,

⁶²alles wat oor my teenstanders se lippe kom, en hulle geskinder oor my die hele dag.

⁶³Of hulle sit en of hulle opstaan, kyk tog, hulle spotlied gaan oor my.

⁶⁴U, o Here, sal hulle volgens die werke van hulle hande vergeld.

⁶⁵U maak hulle harte onbeskaamd; mag u vloek oor hulle kom!

⁶⁶U sal hulle in toorn vervolg en hulle uitroei onder die hemel van die Here.