Psalms 55— 2020

¹Nkulunkulu, lalela umkhuleko wami, ungazifihli ekunxuseni kwami.

²Ngizwele, ungiphendule; ngikhathazekile, ngiyabubula, ngixakekile,

³ngenxa yezwi lesitha, nangenxa yokucindezela komubi, bagingqela okubi phezu kwami, bangizingela bengithukuthelele.

⁴Inhliziyo yami iyathuthumela ngaphakathi, ukwesaba ukufa kungehlele.

⁵Nginengebhe, ngiyaqhaqhazela, ngikhungethwe wukwesaba.

⁶Ngibe sengithi: “Ukuba benginamaphiko njengejuba, ngabe ngindizela kwelikude, ngihlale khona nginethezeke.”

⁷Bengiyakubaleka, ngiye kude, ngihlale ehlane.

⁸Bengizophuthuma ngithole umpheme ukuze ngiphephe ezivunguvungwini naseziphephweni.

⁹Bahlakaze, Nkosi, uphithanise ulimi lwabo, ngokuba ngibone ubudlova nengxabano emzini.

¹⁰Emini nasebusuku, bazulazula bezungeza phezu kwezingange zawo, inkohlakalo nenkathazo kukuwo.

¹¹Incithakalo itholakala kuwo, ingcindezelo nenkohliso akusuki esigcawini sawo.

¹²Ukuba bengiklolodelwa yisitha, bengizokubekezelela lokho, nokuba bekungongizondayo oziphakamise phezu kwami, bengizomcashela.

¹³Kepha nguwe ntanga yethu, mhlobo wami nomngani wami.

¹⁴Besihlala ndawonye kamnandi; besihamba simshungu munye siya endlini kaNkulunkulu nebandla elithokozayo.

¹⁵Ukufa makubazume, behlele endaweni yabafileyo besaphila, ngokuba ububi busezindlini zabo, phakathi kwabo.

¹⁶Kepha mina ngizokhala kuNkulunkulu uSimakade, uzongisindisa.

¹⁷Ekuseni, emini nantambama ngizokhala kuye, ngibubule, uzolizwa izwi lami.

¹⁸Uyakuwukhulula umphefumulo wami ngokuthula, empini engibhekene nayo, ngokuba baningi abamelene nami.

¹⁹UNkulunkulu esesihlalweni kwasemandulo uzongizwa, abathobise, ngokuba abaphenduki, futhi abamesabi uNkulunkulu.

²⁰Ugadla kulabo ahlalisene kahle nabo, usijivazile isivumelwano sakhe,

²¹amazwi akhe abushelelezi kunamafutha, kodwa inhliziyo igaya izibozi.

²²Phonsa umthwalo wakho kuSimakade, Yena uzokusimamisa. Akayukuvuma naphakade ukuba olungileyo azanyazanyiswe.

²³Wena Nkulunkulu uzobaphonsa emgodini ojulileyo abantu abomele igazi nabakhohlisayo; izinsuku zabo zokuphila aziyukuba ngisho nayingxenye yazo, kodwa mina ngizokwethemba Wena.