Psalms 119— 2020

¹Babusisiwe abandlela iqotho, abahamba ngomthetho kaSimakade.

²Babusisiwe abagcina imiyalo yakhe, abamfuna ngenhlizyo epheleleyo,

³abangakwenzi okungalungile, kodwa abahamba ezindleleni zakhe.

⁴Uyalile ukuba izimiso zakho zigcinwe impela.

⁵Sengathi izindlela zami zingagxila ekugcineni izimiso zakho;

⁶khona ngingeyukujabha, lapho ngihlonipha yonke imiyalelo yakho.

⁷Ngizakukubonga ngenhliziyo eqotho, lapho ngifunda izehlulelo zakho ezilungileyo.

⁸Ngizozigcina izimiso zakho; uze ungangishiyi.

⁹Omusha angayigcina kanjani indlela yakhe ihlanzekile na? Ngokugcina okwezwi lakho.

¹⁰Ngikufunile ngenhliziyo yami yonke, mangingaphambuki emiyalweni yakho.

¹¹Enhliziyweni yami ngiyalilonda izwi lakho, ukuze ngingoni kuwe.

¹²Mawubongwe Wena Simakade, ungifundise izimiso zakho.

¹³Ngomlomo wami ngimemezele zonke izehlulelo zomlomo wakho.

¹⁴Ngithokoza ngendlela yobufakazi bakho kungathi ngethabela ingcebo.

¹⁵Ngizozindla ngeziyalezo zakho, ngizihloniphe izindlela zakho.

¹⁶Ngizothokoza ngezimiso zakho; angiyukulikhohlwa izwi lakho.

¹⁷Yenzele okuhle inceku yakho, ukuze ngiphile, ngigcine izwi lakho.

¹⁸Vula amehlo ami ukuba ngibone izimangaliso ezisemthethweni wakho.

¹⁹Ngingumfokazi emhlabeni, ungangifihleli imiyalo yakho.

²⁰Umphefumulo wami waphukile, ngokuba ngihlala ngilangazelela izehlulelo zakho.

²¹Uyabakhuza abazidlayo, abaqalekisiweyo, abaduka emiyalweni yakho.

²²Susa kimi inhlamba nokweyiswa, ngokuba ngibugcinile ubufakazi bakho.

²³Noma izikhulu zihlala zikhuluma ngami; inceku yakho izindla ngezimiso zakho.

²⁴Ubufakazi bakho buyintokozo yami, bungumeluleki wami.

²⁵Umphefumulo wami unamathela othulini; ngiphilise ngokwezwi lakho.

²⁶Ngimemezele izindlela zami, Wena wangizwa; ngifundise izimiso zakho.

²⁷Ngiqondise indlela yeziyalezo zakho ukuba ngikhulume ngezimangaliso zakho.

²⁸Umphefumulo wami uyakhala ngenxa yosizi; ngiqinise ngokwezwi lakho.

²⁹Susa kimi indlela yamanga, ungiphe ngomusa umthetho wakho.

³⁰Ngiyikhethile indlela yeqiniso; izehlulelo zakho ngizibeke phambi kwami.

³¹Ngibambelele ebufakazini bakho; ungangijabhisi, Simakade.

³²Ngiyakugijima ngendlela yemiyalo yakho, ngokuba uyakungivumela ukuba ngenze kanjalo.

³³Simakade, ngikhombise indlela yezimiso zakho; ngizoyigcina kuze kube sekugcineni.

³⁴Ngiphe ingqondo, ukuze ngiwuqaphele umthetho wakho, ngiwugcine ngenhliziyo yami yonke.

³⁵Ngihambise endleleni yemiyalo yakho, ngokuba ngiyathokoza ngayo.

³⁶Inhliziyo yami yiguqulele ebufakazini bakho, ukuze ngingafuni nzuzo ngokungalungile.

³⁷Phendula amehlo ami angakuboni okuyize, ungiphilise endleleni yakho.

³⁸Yigcwalise encekwini yakho inkulumo yakho eyenza ukuba wesatshwe.

³⁹Dlulisa kimi inhlamba engiyesabayo, ngokuba izehlulelo zakho zinhle.

⁴⁰Ngilangazelela iziyalezo zakho; ngokulunga kwakho ngiphilise.

⁴¹Umusa wakho mawuze kimi, Simakade, insindiso yakho ngokwezwi lakho.

⁴²Khona ngiyakumphendula ongichukuluzayo, ngokuba ngiyalethemba izwi lakho.

⁴³Ungalisusi emlonyeni wami izwi leqiniso, ngokuba ngiyazethemba izehlulelo zakho.

⁴⁴Khona ngiyowugcina njalo umthetho wakho, kuze kube phakade.

⁴⁵Ngizohamba ngenkululeko, ngokuba ngifuna iziyalezo zakho.

⁴⁶Ngizokhuluma ngobufakazi bakho phambi kwamakhosi, ngingajabhi.

⁴⁷Ngiyathokoza ngemiyalo yakho engiyithandayo.

⁴⁸Ngiyakuyihlonipha imiyalo yakho, engiyithandayo, futhi ngizozindla ngezimiso zakho.

⁴⁹Khumbula izwi owalisho encekwini yakho, owangenza ngalo ngaba nethemba.

⁵⁰Lokhu kuyinduduzo ekuhluphekeni kwami, ngokuba izwi lakho lingiphilisile.

⁵¹Abazidlayo bangihleka usulu kakhulu, kepha emthethweni wakho angichezuki.

⁵²Ngiyazikhumbula Simakade, izehlulelo zakho zasendulo; ngiyaduduzeka.

⁵³Ukuvutha kolaka kungibambile, ngenxa yezikhohlakali ezilahla umthetho wakho.

⁵⁴Izimiso zakho zaba yizihlabelelo kimi, endlini yokugogobala kwami.

⁵⁵Simakade, ebusuku ngikhumbula igama lakho, ngigcine umthetho wakho.

⁵⁶Lokhu kwaba ngokwami, ngokuba ngizigcinile iziyalezo zakho.

⁵⁷USimakade uyisabelo sami; ngithi amazwi akho ngizowagcina.

⁵⁸Ngincenga umusa wakho ngenhliziyo yami yonke; ngihawukele ngokwezwi lakho.

⁵⁹Ngizindla ngezindlela zami; izinyawo zami ngiziqondisa ebufakazini bakho.

⁶⁰Ngiyashesha, angilibali ukugcina imiyalo yakho.

⁶¹Nakuba izintambo zezikhohlakali zingithandela, angikhohlwa ngumthetho wakho.

⁶²Phakathi kwamabili ngivuka ngikubonge ngenxa yezehlulelo zakho ezilungileyo.

⁶³Ngingumngani wabo bonke abakwesabayo, abagcina iziyalezo zakho.

⁶⁴Umhlaba ugcwele umusa wakho, Simakade; ngifundise izimiso zakho.

⁶⁵Simakade, ngokwezwi lakho wayenzela okuhle inceku yakho.

⁶⁶Ngifundise ukwehlulela kahle nokwazi, ngokuba ngiyayikholwa imiyalo yakho.

⁶⁷Ngingakahlupheki ngaduka, kepha manje sengiyaligcina izwi lakho.

⁶⁸Umuhle Wena, futhi wenza okuhle; ngifundise izimiso zakho.

⁶⁹Abazikhukhumezayo bangiqambela amanga; ngizozigcina ngenhliziyo yami yonke iziyalezo zakho.

⁷⁰Inhliziyo yabo ilukhuni, abezwa lutho, kodwa mina ngithokoza ngomthetho wakho.

⁷¹Kwaba kuhle kimi ukuba ngihlushwe, ukuze ngifunde izimiso zakho.

⁷²Umthetho womlomo wakho muhle kunezinkulungwane zegolide nezesiliva.

⁷³Ngenziwe yizandla zakho, zangibumba, ngiphe umqondo ukuze ngifunde imiyalo yakho.

⁷⁴Abakwesabayo bayakujabula lapho bengibona, ngokuba ngethemba izwi lakho.

⁷⁵Ngiyazi Simakade, ukuthi izehlulelo zakho zilungile, nokuthi ngokwethembeka wangijezisa.

⁷⁶Umusa wakho mawube yinduduzo encekwini yakho, ngokwezwi lakho.

⁷⁷Ububele bakho mabuze kimi, ukuze ngiphile, ngokuba umthetho wakho uyintokozo yami.

⁷⁸Abazikhukhumezayo mabajabhe, ngokuba bangicindezela ngaphandle kwesizathu; nokho mina ngizozindla ngeziyalezo zakho.

⁷⁹Abakwesabayo nababaziyo ubufakazi bakho mabaphendukele kimi.

⁸⁰Inhliziyo yami mayibe msulwa ezimisweni zakho, ukuze ngingajabhi.

⁸¹Umphefumulo wami ulangazelela insindiso yakho; ngiyalethemba izwi lakho.

⁸²Amehlo ami alangazelela izwi lakho, ngithi: “Uyakungiduduza nini na?”

⁸³Noma senginjengemvaba entuthwini, izimiso zakho angizikhohlwa.

⁸⁴Zingaki izinsuku zenceku yakho na? Uyakubehlulela nini abangizingelayo na?

⁸⁵Abaqhoshayo bangimbela imigodi, labo abaphambene nomthetho wakho.

⁸⁶Yonke imiyalo yakho yethembekile, ngihlushwa ngaphandle kwesizathu; ngisize.

⁸⁷Bacishe bangiqeda emhlabeni, kodwa angizishiyanga iziyalezo zakho.

⁸⁸Ngesihawu sakho hlenga impilo yami, ukuze ngibugcine ubufakazi bakho obusho ngomlomo wakho.

⁸⁹Simakade, izwi lakho limi liqinile ezulwini, kuze kube phakade.

⁹⁰Ezizukulwaneni ngezizukulwane ukwethembeka kwakho kukhona; wamisa umhlaba; usemi.

⁹¹Ngokwezehlulelo zakho kusekhona nanamuhla, ngokuba konke kuyizinceku zakho.

⁹²Ukuba umthetho wakho ubungesiyo intokozo yami, ngabe ngibhubhele ekuhluphekeni kwami.

⁹³Iziyalezo zakho angiyukuzikhohlwa kuze kube phakade, ngokuba ungiphilisile ngazo.

⁹⁴Ngingowakho, ngisindise, ngokuba ngizifunile iziyalezo zakho.

⁹⁵Izikhohlakali zicuthele ukungibhubhisa, kodwa mina ngigcina ubufakazi bakho.

⁹⁶Ngibonile ukuthi konke kunesiphetho, kodwa umyalo wakho ubanzi kakhulu.

⁹⁷Umthetho wakho ngiwuthanda kakhulu. Ngizindla ngawo usuku lonke.

⁹⁸Ngemiyalo yakho, ngiyahlakanipha kunezitha zami, ngokuba inami kuze kube phakade.

⁹⁹Nginokuqonda okubedlula bonke abangifundisayo, ngokuba ngizindla ngobufakazi bakho.

¹⁰⁰Ngiqonda ukwedlula izingwevu, ngokuba ngigcina iziyalezo zakho.

¹⁰¹Ngiyazinqanda izinyawo zami ezindleleni zonke zokubi, ukuze ngigcine izwi lakho.

¹⁰²Ezehlulelweni zakho, angichezuki, ngokuba Wena uyangifundisa.

¹⁰³Anambitheka kamnandi amazwi akho, adlula uju emlonyeni wami.

¹⁰⁴Ngeziyalezo zakho ngizuza ukuqonda, ngalokho-ke ngiyazizonda zonke izindlela zamanga.

¹⁰⁵Izwi lakho liyisibani ezinyaweni zami nokukhanya endleleni yami.

¹⁰⁶Ngifungile, futhi ngakuqinisekisa ukuthi ngizozigcina izehlulelo zakho ezilungileyo.

¹⁰⁷Simakade, ngihlupheka kakhulu, ngiphilise ngokwezwi lakho.

¹⁰⁸Simakade, yamukela iminikelo yesihle yomlomo wami, ungifundise izehlulelo zakho.

¹⁰⁹Umphefumulo wami usesandleni sami njalo, nokho umthetho wakho angiwukhohlwa.

¹¹⁰Izikhohlakali zingicuphile, kepha angichezukanga eziyalezweni zakho.

¹¹¹Ubufakazi bakho buyifa lami laphakade, ngokuba buwukuthokoza kwenhliziyo yami.

¹¹²Inhliziyo yami ngiyinamathelise ekwenzeni izimiso zakho, kuze kube sekupheleni.

¹¹³Ngiyabazonda abanhliziyo mbili, kepha umthetho wakho ngiyawuthanda.

¹¹⁴Wena uyisiphephelo sami nesihlangu sami; ngiyalethemba izwi lakho.

¹¹⁵Sukani kimi, nina enenza okubi, ngokuba mina ngizoyigcina imiyalo kaNkulunkulu wami.

¹¹⁶Ngiphase ngokwezwi lakho, ukuze ngiphile, ngingajabhi ngethemba lami.

¹¹⁷Ngisekele, ngize ngisindiswe, ukuze ngiqikelele ukugcina izimiso zakho njalo.

¹¹⁸Uyabalahla bonke abachezuka ezimisweni zakho, ngokuba ubuqili babo buyize.

¹¹⁹Zonke izikhohlakali emhlabeni uzichitha njengamanyela, ngalokho-ke ngiyabuthanda ubufakazi bakho.

¹²⁰Umzimba wami uyathuthumela ngenxa yokukwesaba, ngiyazesaba izehlulelo zakho.

¹²¹Ngenze ubulungiswa nokulunga; unganginikeli kwabangicindezelayo.

¹²²Qinisekisa inhlalakahle yenceku yakho; ungabavumeli abazidlayo bangicindezele.

¹²³Amehlo ami alangazelela insindiso yakho nezwi lokulunga kwakho.

¹²⁴Inceku yakho iphathe ngomusa wakho, ungifundise izimiso zakho.

¹²⁵Ngiyinceku yakho; ngiphe ingqondo ukuba ngazi ubufakazi bakho.

¹²⁶Sekuyisikhathi sokuba uSimakade asukume, ngokuba bawuphulile umthetho wakho.

¹²⁷Ngalokho ngiyayithanda imiyalo yakho kunegolide, impela kunegolide elicwengekileyo.

¹²⁸Ngakho-ke ngiyavuma ukuthi imiyalo yakho yonke ilungile; ngiyazizonda zonke izindlela zamanga.

¹²⁹Ubufakazi bakho buyamangalisa, yingakho umphefumulo wami ubugcina.

¹³⁰Ukwambulwa kwamazwi akho kunika ukukhanya, kuyabaqondisa abangenalwazi.

¹³¹Ngivula umlomo wami, nginelukuluku, ngokuba ngiyayilangazelela imiyalo yakho.

¹³²Bheka ngakimi, ube nomusa kimi njengoba wenza kwabathanda iGama lakho.

¹³³Izinyathelo zami ziqinise ezwini lakho; mangingabuswa nayinye inkohlakalo.

¹³⁴Ngihlenge ekucindezelweni ngabantu, ukuze ngizigcine iziyalezo zakho.

¹³⁵Yikhanyisele inceku yakho ubuso bakho, ngifundise izimiso zakho.

¹³⁶Kugobhoza imifula yamanzi emehlweni ami, ngokuba abawugcini umthetho wakho.

¹³⁷Wena Simakade ulungile; izehlulelo zakho ziqotho.

¹³⁸Ubufakazi bakho ubuqoke ngokulunga nangokwethembeka okukhulu.

¹³⁹Ukushisekela kwami kungidlile, ngokuba izitha zami zikhohliwe ngamazwi akho.

¹⁴⁰Izwi lakho lihloliwe kakhulu, yingakho inceku yakho ilithanda.

¹⁴¹Ngimncane, ngedelelekile; nokho iziyalezo zakho angizilibali.

¹⁴²Ukulunga kwakho kungukulunga okuphakade; umthetho wakho uyiqiniso.

¹⁴³Ukuhlupheka nosizi kungehlele; imiyalo yakho iyintokozo yami.

¹⁴⁴Ukulunga kobufakazi bakho kumi ingunaphakade; ngiphe ukuqonda ukuze ngiphile.

¹⁴⁵Ngizwe Simakade, ngikhala ngenhliziyo yami yonke; ngizozigcina izimiso zakho.

¹⁴⁶Ngikhala kuwe, ngisindise; ngizobugcina ubufakazi bakho.

¹⁴⁷Ngivuka ekuseni ngovivi ngikhale; ngiyawethemba amazwi akho.

¹⁴⁸Ngiqwasha kuze kube kwesikabhadakazi, ukuze ngizindle ngezwi lakho.

¹⁴⁹Simakade, yizwa izwi lami ngokomusa wakho, ungiphilise ngokwezehlulelo zakho.

¹⁵⁰Bayasondela abalandela inkohlakalo; bakude nomthetho wakho.

¹⁵¹Wena Simakade useduze; imiyalo yakho yonke iyiqiniso.

¹⁵²Kade ngazi kwasemandulo ngobufakazi bakho ukuthi ubusekele kuze kube phakade.

¹⁵³Bheka ukuhlupheka kwami, ungikhulule, ngokuba angiwukhohlwa umthetho wakho.

¹⁵⁴Mela indaba yami, ungihlenge, ungiphilise ngokwezwi lakho.

¹⁵⁵Ukusindiswa kukude nezikhohlakali, ngokuba azizifuni izimiso zakho.

¹⁵⁶Ububele bakho, Simakade, bukhulu; ngiphilise ngokwezehlulelo zakho.

¹⁵⁷Abangizingelayo nabayizitha zami baningi, kodwa angichezuki emiyalelweni yakho.

¹⁵⁸Uma ngibona amambuka, ngiyadikibala, ngokuba awaligcini izwi lakho.

¹⁵⁹Bheka ukuthi ngizithanda kangakanani iziyalezo zakho, Simakade; ngiphilise ngokomusa wakho.

¹⁶⁰Amazwi akho wonke ayiqiniso; zonke izehlulelo zakho ezilungileyo zimi kuze kube phakade.

¹⁶¹Izikhulu zingizingela ngaphandle kwesizathu, kodwa inhliziyo yami yesaba izwi lakho.

¹⁶²Ngiyathokoza ngezwi lakho njengomuntu ejabulela impango eningi.

¹⁶³Amanga ngiyawazonda, futhi ngiyawenyanya, kodwa ngiyawuthanda umthetho wakho.

¹⁶⁴Kasikhombisa ngosuku, ngiyakudumisa ngezehlulelo zokulunga kwakho.

¹⁶⁵Abathanda umthetho wakho banokuthula okukhulu; akukho sikhubekiso kubo.

¹⁶⁶Simakade, ngethemba insindiso yakho, futhi nemiyalo yakho ngiyayigcina.

¹⁶⁷Umphefumulo wami ugcina ubufakazi bakho; ngibuthanda kakhulu.

¹⁶⁸Ngigcina iziyalezo zakho nemiyalo yakho, ngokuba izindlela zami zonke ziphambi kwakho.

¹⁶⁹Ukukhala kwami makufinyelele phambi kwakho, Simakade; ngiqondise ngokwezwi lakho.

¹⁷⁰Ukunxusa kwami makufinyelele phambi kwakho; ngihlenge ngokwezwi lakho.

¹⁷¹Umlomo wami mawuchichime indumiso, ngokuba uyangifundisa izimiso zakho.

¹⁷²Ulimi lwami malukhulume izwi lakho, ngokuba imiyalo yakho yonke ilungile.

¹⁷³Isandla sakho masibe lusizo kimi, ngokuba ngikhethe iziyalezo zakho.

¹⁷⁴Ngiyayilangazelela insindiso yakho, Simakade; umthetho wakho uyintokozo yami.

¹⁷⁵Umphefumulo wami mawuphile, ukudumise; izehlulelo zakho mazingisize.

¹⁷⁶Ngiduka njengemvu elahlekileyo; funa inceku yakho, ngokuba angiyikhohlwa imiyalo yakho.