Proverbs 27— 2020

¹Ungazigabisi ngekusasa, ngoba awazi ukuthi usuku lukuphatheleni.

²Mawutuswe ngomunye, kungabi ngowakho umlomo; kube ngumfokazi, hhayi izindebe zakho.

³Itshe liyasinda nesihlabathi sinzima, kodwa ukuchukuluza kwesiwula kusinda ukwedlula kokubili.

⁴Ulaka lungulunya nentukuthelo iyisikhukhula, kepha ngubani ongema phambi komhawu na?

⁵Ukusola okusobala kungcono kunothando olufihliweyo.

⁶Amanxeba adalwe ngumngani anokwemukeleka kunokwanga okuningi kwesitha.

⁷Umphefumulo osuthi uyacikwa wuju, kodwa emphefumulweni olambileyo, ngisho okubabayo imbala, kumnandi.

⁸Njengenyoni esuka ibaleka esidlekeni sayo, unjalo umuntu obalekele indawo yakhe.

⁹Amafutha namakha kuyayithokozisa inhliziyo, kodwa umphefumulo udabukiswa yinhlupheko.

¹⁰Ungamlahli umngani wakho noma okayihlo; ungabalekeli endlini yomfowenu ngosuku lwenhlekelele. Ungcono umakhelwane oseduze kunesihlobo esihlala kude.

¹¹Ndodana yami, hlakanipha, uthokozise inhliziyo yami ukuze ngiphendule ongisolayo.

¹²Ohlakaniphile uyabubona ububi, acashe, kodwa abangenalwazi bayaqhubeka, bese beyajeziswa.

¹³Thatha ingubo yalowo oyisibambiso somfokazi, umbambe abe yisibambiso omela abezizwe.

¹⁴Obusisa umakhelwane ngokubanga umsindo evuka ekuseni, kuyobalelwa kuye, kube yisiqalekiso.

¹⁵Owesifazane obeleselayo ufana nemvula engumvimbi.

¹⁶Ukumvimba kufana nokuvimba umoya, nokubamba amafutha.

¹⁷Insimbi ilola enye insimbi, nomuntu usizwa ngabanye.

¹⁸Olonda umkhiwane uyakudla izithelo zawo; novikela inkosi yakhe, uyakuhlonishwa.

¹⁹Njengamanzi ekhombisa ubuso, injalo nenhliziyo yomuntu komunye.

²⁰Indawo yabafileyo nokubhubha akusuthi, namehlo omuntu awasuthi.

²¹Ukhamba lokuncibilikisela lungolwesiliva, nesithando somlilo singesegolide; kanjalo umuntu unjengodumo lwakhe.

²²Noma ungasigqula esigqulweni isiwula, usisile ngembokodo etsheni, kepha ubuwula baso abuyukusuka kuso.

²³Yazi nokwazi ukuma kwezimvu zakho, ubeke inhliziyo yakho emihlanjini yakho.

²⁴Ngokuba ingcebo ayiyukuhlala kuze kube phakade; nomqhele uyakuhlala yini izizukulwane ngezizukulwane na?

²⁵Lapho utshani bushabalala, kuhluma obusha, bese kukhiwa imifino ezintabeni,

²⁶izimvu zingezokuba wembathe, nezimbuzi ukuba zibe yintengo yensimu.

²⁷Kuyakuba khona ubisi lwezimbuzi olwanele, ukuba lube ukudla kwakho nokudla kwendlu yakho, kwamantombazana akho.