Proverbs 26— 2020

¹Njengeqhwa ehlobo, nemvula ngesikhathi sokuvuna, kanjalo udumo alusifanele isiwula.

²Njengenyoni ekuhambeni kwayo, nenkonjane ekundizeni kwayo, sinjalo isiqalekiso esingenasizathu.

³Isiswebhu singesehhashi, netomu lingelembongolo, noswazi lungolomhlane weziwula.

⁴Ungasiphenduli isiwula njengobuwula baso, funa ufane naso.

⁵Phendula isiwula njengobuwula baso, funa sibe ngohlakaniphileyo emehlweni aso.

⁶Othumela umbiko ngesiwula uzigwaza ngowakhe; ufana nozinqume izinyawo.

⁷Njengemilenze yokhubazekileyo elengayo, sinjalo nesaga emilonyeni yeziwula.

⁸Onika isiwula udumo ufana nobophela itshe endwayimaneni.

⁹Njengeva elihlaba isandla sesidakwa, sinjalo nesaga emilonyeni yeziwula.

¹⁰Njengomnembi ngomcibisholo olimaza bonke, unjalo oqasha isiwula esizidlulelayo.

¹¹Njengenja ebuyela ebuhlanzweni bayo, kanjalo isiwula siphinda ubuwula baso.

¹²Kunethemba ngesiwula kunozibona ehlakaniphile emehlweni akhe.

¹³Ivila lithi: “Kukhona ingonyama endleleni, nebhubesi phakathi esigcawini.”

¹⁴Isicabha siphenduka ngezingibe zaso, nevila ecansini lalo.

¹⁵Ivila liyasifihla isandla salo esitsheni; alisibuyiseli emlonyeni walo.

¹⁶Ivila lihlakaniphile emehlweni alo, kunabayisikhombisa abakhuluma okuhluzekile.

¹⁷Njengomuntu obamba inja eyedlulayo ngamadlebe, unjalo ozigaxa engxabanweni yabanye abantu.

¹⁸Njengohlanya oluphonsa izikhuni nemicibisholo ebulalayo,

¹⁹unjalo umuntu okhohlisa umakhelwane wakhe, athi: “Bengizintelela nje.”

²⁰Ngaphandle kwezikhuni, umlilo uyacima, kanjalo lapho kungekho khona abahlebayo, ingxabano iyaphela.

²¹Njengamalahle othuthwini nezinkuni emlilweni, unjalo umuntu ophehla udweshu.

²²Amazwi ohlebayo anjengesibiliboco: ayehlela ezibilini zomuntu.

²³Njengesiliva okucakwe ngalo isitsha sobumba, zinjalo izindebe ezishelelayo nenhliziyo embi.

²⁴Onenzondo uyazenzisa ngokukhuluma kwakhe, ebe enenhloso embi enhliziyweni yakhe.

²⁵Lapho ekhuluma ngendlela emnene, ungakholwa, ngokuba kunezinengiso eziyisikhombisa enhliziyweni yakhe.

²⁶Noma inzondo yakhe isibekelwa yinkohliso, ububi bakhe buyodaluleka ebandleni.

²⁷Omba umgodi uyakuphonseka kuwo, nogingqa itshe liyakubuya ligaye yena.

²⁸Ulimi oluhubhuza amanga luyabazonda olubalimazile; nomlomo othophayo uyabhubhisa.