Job 41— 2020

¹“Ungayidoba yini inkanyamba ngodobo, noma ubophe ulimi lwayo ngentambo na?

²Ungayifaka yini umkhala ekhaleni layo, ubhoboze umhlathi wayo ngehhuku na?

³Iyokwenza imikhuleko eminingi yini kuwe, ikhulume amazwi athobekileyo na?

⁴Iyosenza yini nawe isivumelwano sokuba uyithathe, ibe yinceku, kuze kube phakade na?

⁵Ungadlala yini nayo njengenyoni, uyibophe ngomchilo ukuze amantombazane akho adlale nayo na?

⁶Abathengi bangathengiselana yini ngayo, abahwebi behlukaniselane ngayo na?

⁷Isikhumba sayo ungasigwaza yini ngezinhlendla, nekhanda layo ngemikhonto yokubamba izinhlanzi na?

⁸Beka isandla sakho kuyo, uzokhumbula impi ezosuka; awusayukukuphinda lokho.

⁹Ithemba lakho lokuyibamba liyimbude, bonke baqumbeka phansi uma beyibona.

¹⁰Akekho onesibindi sokuba angayivusa. Pho ngubani ongema phambi kwayo na?

¹¹Ngubani ongayisukela, qede aphephe na? Konke okuphansi kwezulu kungokwami.

¹²“Angiyukuthula ngezitho zayo, nangendaba yamandla ayo, nangesimo sayo esihle.

¹³Ngubani ongayihlubula isembatho sayo esingaphandle na? Ngubani ongangena phakathi kwemihlathi yayo emibili na?

¹⁴Ngubani ongavula izicabha zomlomo wayo na? Amazinyo ayo ayesabeka nxazonke.

¹⁵Umhlane wayo uyizinhla zezihlangu, zinamatheliswe njengophawu.

¹⁶Zisondelene, akungeni moya phakathi kwazo.

¹⁷Zihlanganiswe ndawonye, zinamathelene, azinakwehlukaniswa.

¹⁸Ukuthimula kwayo kuveza ukukhanya, amehlo ayo afana nemisebe yokusa.

¹⁹Emlonyeni wayo kuphuma izihlonti, kuqhashe izinhlansi zomlilo.

²⁰Kuphuma intuthu emakhaleni ayo, sengathi kubila ibhodwe noma kusha imihlanga.

²¹Ukuphefumula kwayo kokhela amalahle, kuphuma ilangabi emlonyeni wayo.

²²Entanyeni yayo kuhlala amandla, ingebhe isine phambi kwayo.

²³Izicubu zayo zinamathelene, ziphicelwe kuyo azinakwehlukaniswa.

²⁴Inhliziyo yayo iqine njengetshe, yebo, iqinile njengetshe lokusila elingaphansi.

²⁵Uma ivuka, abanamandla bangenwa yitwetwe ngenxa yevuso, baphela amandla.

²⁶Noma inkemba, umkhonto, umcibisholo nengcula kufinyelela kuyo, akunamthelela kuyo.

²⁷Insimbi iyithatha njengotshani, nethusi njengebunga.

²⁸Umcibisholo awunakuyixosha, namatshe endwayimane aphenduka amabibi kuyo.

²⁹Izagila zifana namakhoba kuyo, iyakuhleka ukukhenceza kwengcula.

³⁰Ingaphansi layo linjengezindengezi ezibukhali, yenaba njengesibhulo odakeni.

³¹Yenza izinzulu zibile njengebhodwe, ulwandle ilwenze lufane nomfuma wamafutha.

³²Ishiya umgudu ocwebezelayo emva kwayo, utwa kube sengathi lungwevu.

³³Emhlabeni akukho okufana nayo, yenziwe yangaba nakwesaba.

³⁴Ikubona konke okuziphakamisayo, iyinkosi phezu kwabo bonke abantwana abazikhukhumezayo.”