Job 37— 2020

¹“Ngenxa yalokho inhliziyo yami iyathuthumela, isuke endaweni yayo.

²Lalelani, nizwe ukuduma kwezwi lakhe, nemvunge ephuma emlonyeni wakhe.

³Ukuthumela phansi kwezulu lonke, unyazi lwakhe luye emagumbini omhlaba.

⁴Emveni kwalokho izwi lakhe liyaduma, uyaduma ngezwi lakhe lobukhosi, akalunqandi unyazi uma kuzwakala izwi lakhe.

⁵UNkulunkulu uduma ngokumangalisayo ngezwi lakhe; wenza izinto ezinkulu esingenakuziqonda.

⁶Ngokuba uthi eqhweni: ‘Khithikela emhlabeni;’ kanjalo nasesihlambini semvula, yebo, ezihlambini zezimvula zakhe ezinamandla.

⁷Ubeka uphawu ezandleni zabantu ukuze bonke abantu bayazi imisebenzi yakhe.

⁸Izilwane zibuyela ezikhundleni zazo, zihlale emihumeni yazo.

⁹Isikhwishikhwishi siphuma engosini yaso, namakhaza avela emoyeni ohlabayo.

¹⁰Ngokuphefumula kukaNkulunkulu, kuvela ungqoqwane namanzi ngobuningi bawo, abe yiqhwa.

¹¹Yebo, ugcwalisa amafu ngomswakama, awendlale amafu onyazi lwakhe,

¹²ayazungeza, ajikeleze njengalokhu ewaqondisa, ukuze akufeze konke awayale khona ebusweni bomhlaba,

¹³noma ngabe lokho ukwenzela ukujezisa, noma umhlaba wakhe, noma ngothando, uyakuvumela ukuba kwenzeke.

¹⁴“Beka indlebe kulokhu, Jobe, uthule du, uzindle ngezimangaliso zikaNkulunkulu.

¹⁵Uyazi yini ukuthi uNkulunkulu uwashayela kanjani umthetho, enze unyazi lwakhe lubanize emafini na?

¹⁶Uyazi yini ukuthi amafu endlaleke kanjani, umsebenzi omangalisayo walowo Ophelele olwazini,

¹⁷wena ozembatho zakho zifudumele, lapho umhlaba uthule ngenxa yeshisandlu na?

¹⁸Ungaseneka yini isibhakabhaka njengaye, siqine njengesibuko esibunjiweyo na?

¹⁹Sifundise esiyakukusho kuye, asinakulubeka udaba lwethu, ngenxa yokuthi sidukuza oswini.

²⁰Angatshelwa yini uNkulunkulu ukuthi ngizokhuluma na? Ukhona yini ongathi ufuna ukubhujiswa na?

²¹Abantu abazukuwubona umbani emafini ngoba umoya sewedlulile, selicwathile.

²²Ngasenyakatho kuqhamuka inkazimulo yegolide, uNkulunkulu wembethe ubukhosi obesabekayo.

²³USomandla singemqonde, mkhulu ngamandla nangobulungiswa, ngokulunga kwakhe okukhulu akoni muntu.

²⁴Ngakho-ke abantu bayamesaba, kodwa akabagqizi qakala abacabanga ukuthi bayizihlakaniphi ezinhliziyweni zabo.”