Job 36
1 U-Elihu waqhubeka wathi:
2 “Ngibekezelele kancane, ngizokukhombisa, ngokuba ngisenamazwi okumela uNkulunkulu.
3 Ngizolulanda kude ulwazi lwami, ngikunike uMenzi wami ukulunga.
4 Impela ayikho inkohliso emazwini ami; onolwazi olupheleleyo unawe.
5 “Bheka, uNkulunkulu unamandla, kodwa akukho muntu ambukela phansi, mkhulu emandleni okuqonda.
6 Akazigcini izigilamkhuba ziphila, kepha abahluphekayo ubenzela ubulungiswa.
7 Amehlo akhe akawasusi kwabalungileyo, kodwa ubahlalisa namakhosi ezihlalweni zobukhosi, baphakame, kuze kube phakade.
8 Uma beboshwa ngamaketango, babanjwe yizintambo zokuhlupheka,
9 lapho uyababonisa izenzo zabo neziphambeko zabo ukuthi baziphakamisile.
10 Uyazivula izindlebe zabo ukuze zizwe ukuyalwa, abayale ukuba baphenduke eziphambekweni zabo.
11 Uma belalela, bamkhonze, imihla yabo iyophetha ngempumelelo neminyaka yabo, bethokozile.
12 Kepha uma bengalaleli, bayobhubha ngenkemba, bafe bengenalwazi.
13 “Abangenakulunga enhliziyweni baqongelela ulaka, abakhali bacele usizo lapho ebabopha.
14 Bafa besebasha, ukuphila kwabo kuphelele ehlazweni.
15 Ukhulula ompofu ngobuphofu bakhe, avule indlebe yabo ngokuhlupheka.
16 “Impela uyakukukhulula osizini, akubeke endaweni ebanzi, lapho kungekho ukunyinyeka khona, kubekwe okunonile etafuleni lakho.
17 Kepha wena uhluphekile ngokuthi izikhohlakali ziyakujeziswa yini; ukwehlulela nobulungiswa kuyokwenziwa.
18 Qaphela ingcebo, ingakuyengi, ungachezukiswa ngubukhulu bokufunjathiswayo.
19 Ukuceba kwakho, nayo yonke imizamo yezikhwepha zakho, kungakusiza yini ukuba ungabi sosizini na?
20 Ungabulangazaleli ubusuku lapho abantu bebhujiswa ezindaweni zabo.
21 Qaphela, ungaphendukeli ebubini, ngokuba ngalokho uyobe uzikhethele usizi.
22 “UNkulunkulu uphakeme ngamandla akhe; ngubani ofundisa njengaye na?
23 Ngubani ombekele indlela azohamba ngayo na? Ngubani ongathi: ‘Wenze okungalungile’ na?
24 Khumbula ukudumisa imisebenzi yakhe abahlabelela ngayo abantu.
25 Bonke abantu bayibonile, bonke bayibukela kude.
26 Bheka, uNkulunkulu uphakeme, asimqondi, ubungako beminyaka yakhe abunakuphenywa.
27 “Wenyusa amathonsi amanzi, abuye awathulule njengemvula enkungwini yakhe.
28 Amafu uwenza aconse, awathululele phezu kwabantu abaningi.
29 Ukhona yini ongakuqonda ukuthi amafu uweneke kanjani, nokuduma kwedokodo lakhe na?
30 Umbani wakhe uyawusabalalisa umzungeze, amboze izisekelo zolwandle.
31 Ngokuba ngalokho ubusa abantu, abaphe ukudla okuningi.
32 Usibekela izandla zakhe ngombani, awuyale ukuba ushaye inkololo.
33 Ukuduma kwawo kulanda ngaye, isiphepho sibikezela ngolaka lwakhe.”