Isaiah 3— 2020

¹Bheka, iNkosi uSimakade Wamabandla iyakususa eJerusalema nakwaJuda konke abaphila ngakho, konke ukudla namanzi:

²amaqhawe namadoda empi, abehluleli nabaphrofethi, ababhuli namalunga,

³izinduna zamashumi ayisihlanu nabantu abanodumo, abeluleki nezingcweti ezihlakaniphileyo, nabanolwazi lokulumba.

⁴Ngiyobeka abafana babe yizikhulu zabo; izingane zibabuse.

⁵Abantu bayocindezelana; yilowo nalowo acindezele omunye, kube yilowo nalowo umakhelwane wakhe; izingane ziyokwedelela abadala, nabantukazana badelele izikhulu.

⁶Umuntu uyobamba umfowabo abavela ndlini yinye kayise, athi: “Wena unengubo, yiba ngumbusi wethu, le ncithakalo ibe phansi kwesandla sakho.”

⁷Ngalolo lusuku uyodazuluka, athi: “Angiyukuba ngumelaphi, ngokuba akukho sinkwa nangubo endlini yami; ningangibeki umbusi wabantu.”

⁸IJerusalema likhubekile, noJuda uwile, ngokuba abakushoyo nabakwenzayo kuphambene noSimakade, kwedelela ubukhona benkazimulo yakhe.

⁹Ukubukeka kobuso babo kufakaza ngabo; izono zabo bazenza obala njengaseSodoma, abazifihli. Maye kubo! Ngokuba bazilethela ububi phezu kwabo.

¹⁰Tshelani abalungileyo ukuthi kuyobahambela kahle, ngokuba bayokudla izithelo zezenzo zabo.

¹¹Maye komubi! Kuzomhambela kabi, ngokuba kuyakwenziwa kuye lokho izandla zakhe ezikwenzileyo.

¹²Abantu bami bacindezelwa yizingane, babuswa ngabesifazane. Bantu bami, abaniholayo bayanidukisa; baphambanisa indlela eniziphatha ngayo.

¹³USimakade umele isikhundla sakhe, ukuthetha icala, ehlulela izizwe.

¹⁴USimakade uze ukuzokwehlulela ekanye namalunga abantu bakhe nabaholi babo, uthi: “Yini eniqede isivini, nabuthela impango yabampofu ezindlini zenu.

¹⁵Nibachobozeleni abantu bami, nafihliza ubuso babampofu na?” kusho iNkosi uSimakade Wamabandla.

¹⁶USimakade wathi: “Ngenxa yokuziphakamisa kwamadodakazi aseZiyoni, ahamba elule izintamo, ecwayizisa amehlo, eshayela phezulu, ekhencezisa amadavathi ezinyawo zawo;

¹⁷ngenxa yalokho, iNkosi iyozenza izimpandla izinkakhayi zamadodakazi aseZiyoni; uSimakade uyowashiya eyizingengelezi.”

¹⁸Ngalolo lusuku iNkosi iyosusa imihlobiso yawo: izigqizo, imiqhele, izimbedu ezinjengenyanga,

¹⁹iziqhaza, amasongo, izimvakazi,

²⁰izigqoko, imihlobiso yemilenze, izibhamba, imifuma, iziqu,

²¹izindandatho, amacici asemakhaleni,

²²izembatho zemikhosi, nezangaphezulu, amatshali, izinqalathi,

²³izibuko, ilineni elicolekileyo, imishuqulo, nezilwembu zokuhlonipha.

²⁴Esikhundleni samakha, kuyoba ngukubola; nasesikhundleni sebhande, kube yintambo; esikhundleni sezinwele ezilungiswe kahle, kube yimpandla; nasesikhundleni sesidiya, kube yisibhamba sendwangu eyisaka; nasesikhundleni sobuhle, kube yisishada.

²⁵Amadoda akho ayokuwa ngenkemba namaqhawe akini asale empini.

²⁶Amasango alo ayokhala, alile; liyakuba yize, liqumbeke phansi emhlabathini.