Revelation 13
1 接等，𠊎看到一隻惡獸對海肚上來。牠有十支角㧯七隻頭那；逐支角戴等冕旒，逐隻頭那寫等侮辱上帝个名號。
2 𠊎看到該惡獸像一條豹仔；牠个腳像熊个腳，嘴像獅仔个嘴。惡龍將自家个能力、座位，㧯大權柄全部交給該隻惡獸。
3 惡獸个一隻頭那像係有受到致命个重傷，總係傷已經好了。全世界攏總盡希奇，跈在該隻惡獸个後背。
4 大家拜該條惡龍，因為惡龍將牠个權柄交給該隻惡獸。佢等也拜該隻惡獸，講：「麼人同這惡獸比抑得呢？麼人有能力同牠交戰啊？」
5 該隻惡獸得到一張誇口㧯褻瀆个嘴，又得到權柄，做得隨意行事四十二個月。
6 該隻惡獸就開嘴侮辱上帝，褻瀆佢个名㧯佢住个所在，並所有住在天頂个。
7 牠又得到權柄㧯聖徒作戰，贏過佢等；也得到權柄轄制各民族、各種人、逐個國家、㧯各種語言个人。
8 所有住在地面上个人、佢等个名在創造世界以前無記在該被人㓾死个羔羊个生命冊底背个，攏總愛拜牠。
9 有耳公好聽个，就愛聽！
10 該當捉去个，一定會被人捉去；該當死在刀下个，一定會死在刀下。所以，聖徒愛有耐心㧯信心。
11 𠊎又看到有另外一隻惡獸對地底下出來。牠有兩支角，像羊个角，總係講話像惡龍。
12 牠在頭一隻惡獸个面前，行頭一隻惡獸一切个權柄。牠強迫大地㧯所有住在地面上个，去拜該隻有受到致命个重傷又好起來个頭一隻惡獸。
13 第二隻惡獸也行大奇事，甚至在人面前喊火對天頂降在地上。
14 牠得到權柄，在頭一隻惡獸个面前行奇事，因為恁樣，就迷惑所有住在地面上个人。牠吩咐世間个人為到該隻有受到刀傷還生生个惡獸作像。
15 第二隻惡獸又得到權柄，將生氣歕入頭一隻惡獸个像，使該座像會講話，也能殺害所有毋拜該座獸像个人。
16 這隻惡獸又強迫所有个人，無論大細、貧賤富貴、奴隸抑係自由人，在佢等个右手抑係額頭揝印仔做記號。
17 這記號就係該隻惡獸个名抑係代表名个數目；無這種記號个，就做毋得做買賣。
18 對這個事愛有智慧。願聰明人算出該隻惡獸个數目，因為這數目代表一個人。這個數目係六百六十六。