Revelation 12
1 這時，天頂出現一個盡大又盡神秘个奇事。有一個婦人家身著日頭，腳踏月光，頭那戴等一頂有十二粒星仔个冕旒。
2 姖會𫱔了，𫱔子个陣痛害姖大聲盡喊。
3 天頂又出現另外一個神秘个奇事。有一條紅色个大惡龍，有七隻頭那，十支角；逐隻頭那攏總戴等冕旒。
4 牠用尾將天頂三分之一个星仔捲起來，抨在地上。牠企在該差毋多會𫱔个婦人家面前，等孲𤘅仔一出世，就愛將佢吞落去。
5 該婦人家𫱔一個孻仔；這孲𤘅仔將來愛用鐵杖統治萬國。姖个孻仔受接到上帝个寶座該位去。
6 該婦人家逃走去曠野，到上帝為姖準備个所在。在該位，姖愛得到照顧一千兩百六十日。
7 後來，天頂發生戰爭。米迦勒㧯佢該兜天使去同惡龍相㓾，惡龍也帶牠該兜使者去交戰。
8 總係，惡龍戰敗了；牠㧯牠該兜使者無法度再留在天頂。
9 所以，該條大惡龍被天使抨下來；牠就係該老蛇，名安到魔鬼抑係撒但，係迷惑全人類个。牠被天使抨在地上；牠該兜使者也跈等抨下來。
10 𠊎又聽到天頂有大聲音講：這下就係𠊎等上帝拯救个時節！上帝已經彰顯佢个權能㧯統治！佢所立个基督也顯出佢个權柄！該日夜在𠊎等个上帝面前告𠊎等兄弟姊妹个，已經對天頂抨下來了。
11 𠊎等个兄弟姊妹已經通過羔羊个血㧯佢等所宣佈个真道贏過惡龍了；就係犧牲自家个生命，佢等也甘願。
12 所以，諸天㧯住在其中个，你等應當歡喜快樂！總係，地㧯海慘了；因為魔鬼知佢个時間毋多，滿肚笥火氣下到你等該位去了。
13 該條惡龍發現自家抨落地上，就去迫害該𫱔孻仔个婦人家。
14 有大鷹鳥个兩支翼胛賜給該婦人家，俾姖飛入曠野，去到自家个地方。在該位，姖愛得到照顧三年半，無受該尾蛇个攻擊。
15 該尾蛇在婦人家後背，用嘴噴出水來，像河壩水恁大，愛將姖打走。
16 總係，地幫助該婦人家，打開嘴將該條惡龍噴出來个水吞落去。
17 惡龍對該婦人家盡譴，就去同婦人家其他个子孫相㓾，就係同所有服從上帝命令、為耶穌所啟示个真理做見證个人相㓾。
18 該條惡龍企在海滣个沙灘頂。