Bible

1 有一支像棍仔个尺交給𠊎，有聲對𠊎講：「䟘起來，去量上帝个聖殿㧯祭壇，同時算看在聖殿肚敬拜个人。 2 總係，毋使量聖殿个外院，因為這外院已經留給外邦人；佢等會踐踏聖城四十二個月。 3 𠊎愛差派兩個著麻衫个見證人；佢等愛傳講上帝个話一千兩百六十日。」 4 該兩個見證人就係企在世界个主面前，該兩頭橄欖樹㧯兩支燈臺。 5 若有人想愛傷害佢等，佢等會對嘴肚噴出火焰來燒死敵人。所以，麼人想愛傷害佢等，就會恁樣被佢等㓾死。 6 佢等有權將天關起來，在佢等宣佈上帝个話該兜日仔，喊天莫落雨。佢等也有權掌管所有个水源，喊水變做血，也有權隨時隨意用各種災難攻擊大地。 7 佢等做完見證以後，該對無底坑出來个惡獸愛同佢等相㓾，打贏佢等，將佢等㓾死。 8 佢等个身屍會橫在大城个街項，就係佢等个主被人釘十字架个所在。這城象徵个名可比所多瑪抑係埃及。 9 對各種人、各民族、各語言、㧯逐個國家，會有人來看佢等个身屍三日半，不准人安葬佢等。 10 地上个人會因為佢等个死歡喜快樂。大家慶祝，交換禮物，因為這兩個先知識使地上个人受大苦難。 11 三日半過掉，有生命个靈氣對上帝該位降臨，進入佢等个底背，佢等就企起來；看到佢等个人就非常著驚。 12 這兩個先知聽到對天頂有大聲音對佢等講：「上這位來！」佢等就在敵人个注目之下坐雲升天。 13 就在該時，大地動發生，該座城橫掉十分之一。因為地動，死掉个人有七千儕；賸个人非常著驚，就歸榮光給天頂个上帝。 14 第二種个災難已經過掉；看啊，第三種災難會到了。 15 第七個天使一歕號筒，天頂就有大聲音講：「統治宇宙个權能已經歸𠊎等个主㧯佢所立个基督了；佢愛掌權，直到永永遠遠！」 16 在上帝面前、坐在自家个座位頂高个二十四個長老就伏在地上，敬拜上帝， 17 講：古早存在、這下存在个主—全能个上帝啊，𠊎等感謝你；因為你已經掌管大權，已經實行統治了！ 18 列國發譴，總係，你个大發譴也臨到了。時機已經成熟，死人愛受審判；你个僕人，就係眾先知、眾聖徒、㧯所有敬畏你个人，無論尊貴抑係卑微，全部愛得到獎賞。該兜敗壞大地个人愛堵到毀滅！ 19 這時，上帝在天頂个聖殿打開來；佢个約櫃在聖殿肚顯明出來。接等，就𥍉爧、響雷公、有𠾐𠾐滾个聲、地動、㧯大冰雹。