Bible

1 𠊎又看到一個盡有力个天使對天降下來。佢披等雲，頭那頂有虹圍等；佢个面像日頭，雙腳像𤏸火个柱仔。 2 佢个手拿等一卷打開个細書；右腳踏在海面，左腳踏在地上。 3 佢大聲喊，像獅仔个吼聲；佢一喊，就有七隻雷公應聲。 4 𠊎堵堵想愛將七隻雷公所講个話寫下來，有聲對天頂出來，講：「七隻雷公所講个話，你愛嚴守祕密，毋好寫下來！」 5 這個事以後，𠊎所看到，該企在海面㧯地上个天使向天擎起佢个右手， 6 指等該創造天、地、海，㧯其中萬物个永生上帝發誓講：「毋會再延纏了！ 7 第七個天使歕號筒个時，上帝个奧秘就愛實現，像佢對自家个僕人—就係眾先知所宣告个。」 8 後來，𠊎聽到該先前對天頂出來个聲又對𠊎講：「你去，將企在海面㧯地上个天使手中該卷打開个書拿來。」 9 𠊎行過去，請該天使將該卷細書交給𠊎。佢對𠊎講：「拿去，食落去！你个肚笥會感覺苦苦，總係嘴會像蜂糖恁甜。」 10 𠊎對天使手中將該卷細書接過來，食落去，嘴肚正經像蜂糖恁甜，總係𠊎吞落去以後，肚笥就感覺苦苦。 11 天使又對𠊎講：「上帝對逐個民族、逐個國家、各種語言个人、㧯該兜君王所講个預言，你一定愛再宣佈一擺。」