Revelation 9
1 第五個天使一歕號筒，𠊎就看到有一粒星仔對天頂跌下來，落在地上。無底坑个鎖匙就交給佢。
2 佢打開無底坑，有煙對底背衝出來，像煙對大火爐衝出來一樣；日頭㧯天空全部因為無底坑衝出來个煙變做烏烏。
3 有草蜢對煙底背出來，落在地上；有能力賜給牠兜，像地上个蠍仔所有个能力一樣。
4 牠兜受吩咐毋好傷害地上个草、樹仔、抑係其他个植物，只有做得傷害該兜額頭無揝上帝个印仔个人。
5 草蜢無權害死這兜人，只有害佢等受苦五個月。這種痛苦就像人被蠍仔叮到一樣。
6 在這五個月中，人會求死不得，想死不能。
7 草蜢个樣式像準備愛上戰場个馬一樣。牠兜个頭那戴等像係金仔做个冕旒；牠兜个面像人个面。
8 牠兜个頭那生毛，像婦人家个頭那毛；牠兜个牙齒像獅仔个牙齒。
9 牠兜个胸脯所掛等个，像係鐵做个護心鏡；牠兜个翼胛發出个聲，像一大陣戰車上戰場發出个聲。
10 牠兜像蠍仔一樣，有尾也有竻；有能力害人受五個月个痛苦个就係這個尾。
11 有一個王管理牠兜，就係管無底坑个天使。佢个名希伯來話安到亞巴頓，希臘話安到亞玻倫(意思係毀滅者)。
12 頭一種个災難已經過掉；看啊，跈等還有兩種个災難愛來。
13 第六個天使一歕號筒，𠊎就聽到有聲音對上帝面前該座金壇个四隻角頭發出來。
14 這聲音對歕號筒个第六個天使講：「將關在幼發拉底大河个四個天使放出來！」
15 該四個天使就得到透放。佢等係早就受安排好，愛在這年、這月、這日、這時，㓾掉人類个三分之一。
16 騎兵隊个數目有兩億；佢等个數目𠊎有聽到。
17 在異象中，𠊎看到該兜馬㧯騎兵。騎兵著等紅像火、藍像藍寶石、㧯硫磺色个護心鏡。馬个頭像獅仔頭，牠兜个嘴有火、煙、㧯硫磺噴出來。
18 人類个三分之一被馬嘴所噴出个火、煙、㧯硫磺這三樣災難害死。
19 馬个能力在牠兜个嘴㧯牠兜个尾。牠兜个尾像蛇，也有頭；牠兜就係用這兜頭來傷害人。
20 其他个人，無被這兜災難害死个，還係毋悔改，毋肯㧒掉佢等親手所造个偶像。佢等還係照常拜魔鬼㧯偶像；該兜偶像係用金、銀、銅、石頭、樹仔做个，毋會看、毋會聽、也毋會行。
21 佢等繼續犯兇殺、邪術、淫亂、偷拿這兜罪，完全無悔改。