Revelation 14
1 𠊎再看，看到羔羊企在錫安山，同佢共下个有十四萬四千人；佢等个額頭寫等羔羊㧯厥爸个名。
2 𠊎聽到有聲音對天頂來，像大水个吼聲，也像雷公个大聲。𠊎所聽到个聲又像琴師彈弦琴个聲。
3 佢等企在寶座㧯四個生物並眾長老个面前，唱一首新歌；這首詩歌只有對地上救贖出來个十四萬四千人會唱。
4 這兜人全部係毋識親近婦女个童男。羔羊行到㖠位，佢等就跈到㖠位。佢等係對人類中救贖出來，最先獻給上帝㧯羔羊个。
5 佢等從來毋識講花撩，係無缺點个。
6 𠊎又看到另外一個天使在空中飛；佢有永遠个福音愛向世間逐個國家、各民族、逐種語言、㧯各種个人宣佈。
7 佢大聲講：「愛敬畏上帝，將榮光歸給佢！因為佢審判人類个時節到了。愛敬拜該創造天、地、海，㧯一切泉源个主！」
8 第二個天使跈等講：「橫掉了！大巴比倫橫掉了！因為姖識拿淫亂个烈酒給萬民啉。」
9 第三個天使跈等佢等大聲講：「麼人拜該隻惡獸㧯牠个像，額頭抑係手骨頂高有揝牠个印仔个，
10 就愛啉上帝个烈酒；這個酒係無透淡、斟在佢發譴个杯仔底背个！佢等愛在眾聖天使㧯羔羊面前受烈火㧯硫磺燒个痛苦。
11 刑罰佢等个火煙緊衝等上，永遠毋會停。拜該隻惡獸㧯牠个像个該兜人，受到牠个名號揝印仔个，日夜不得安息。」
12 因為恁樣，該兜服從上帝命令、對耶穌忠心个聖徒愛有耐心。
13 𠊎又聽到對天頂有聲音講：「你愛寫下來：從今以後，在主底背來死个人有福氣！」聖靈應講：「著！佢等會結束勞苦，享受安息，因為佢等工作个成果會跈等佢等。」
14 𠊎一看，看到一團白雲，雲頂坐等一個像係人子个，頭那戴等金冕旒，手拿盡利个禾鐮。
15 另外有一個天使對聖殿出來，對坐在雲頂个大聲講：「時間到了，地面上个五榖熟了！請伸出你个禾鐮去收割！」
16 該坐在雲頂个就用佢个禾鐮向地面𠚼下去，地面上个五榖就收割了。
17 𠊎又看到另外一個天使對天頂个聖殿出來；佢也有一支盡利个禾鐮。
18 接等，又有一個管理火个天使對祭壇該位出來，對手拿盡利禾鐮个天使大聲喊講：「伸出你个禾鐮去收地面上个葡萄，因為葡萄已經熟了！」
19 該天使就用佢个禾鐮向地面𠚼下去，收割地面上个葡萄，將它兜㧒在上帝發譴个大醡酒池底背。
20 用腳蹬城外這隻醡酒池底背个葡萄，有血對醡酒池流出來，淹到三百公里遠，約有兩公尺深。