Bible

1 愛唱新个詩歌讚美上主！全世界都愛來歌頌上主！ 2 愛對上主唱歌，愛頌讚佢个名！愛逐日傳揚佢拯救个福音！ 3 愛對萬國宣傳佢个榮光！愛對萬民講起佢偉大个作為！ 4 上主係最偉大个，應當受最大个讚美；佢應當比所有个神明得到較多个敬畏。 5 列國所有个神明不過係偶像；總係創造諸天个就係上主。 6 榮光、威嚴在佢个面前；大能、榮華充滿佢个聖所。 7 地上个萬族啊，應當頌讚上主！你等愛頌讚佢个榮光㧯大能！ 8 愛頌讚上主榮光个名；愛帶祭物來進入佢个聖殿。 9 愛用聖潔个打扮來跪拜上主；全地愛在佢个面前愊愊掣！ 10 愛向萬國宣佈：「上主掌權！大地堅固，毋會搖動；佢愛用公正來審判萬民。」 11 諸天愛歡喜，大地愛快樂！海㧯其中个生物啊，愛大聲歡呼！ 12 田園㧯其中个出產啊，愛歡喜起來！該時，樹林中个樹木愛在上主面前歡喜唱歌； 13 因為上主愛來，佢愛來治理天下。佢愛用公義統治世界；佢愛用信實對待萬民。