Bible

Psalms 97

Chinese (T) - TNV2012

1 上主掌權！大地啊，愛歡喜起來！所有个海島啊，愛歡喜快樂！

2 雲堆㧯烏暗在佢周圍；正義㧯公當係佢國度个基礎。

3 有火行在佢个頭前，燒滅佢周圍个仇敵。

4 佢个𥍉爧照亮世界；大地看到緊顫緊掣。

5 群山在上主面前，在全地个主面前，就像蠟恁樣鎔掉。

6 諸天宣揚佢个公義；萬民看到佢个榮光。

7 一切敬拜偶像个人會見笑；靠假神來誇口个人會澇潰；萬神攏總愛伏在上主面前。

8 上主啊，因為你个判斷公正，錫安个人民聽到就大歡喜；連猶大該兜城市也盡快樂。

9 上主啊，你係至高个，你統治天下；你係至尊無對个，你超過萬神。

10 上主痛惜該兜惱邪惡个人；佢保護佢忠心子民个生命，拯救佢等脫離壞人个勢力。

11 義人會得到光明照亮；心肝正直个會大歡喜。

12 義人啊，你等愛因為上主歡喜！你等愛感謝佢，頌讚佢个聖名！