Bible

1 上主—萬軍个元帥啊，你个聖所實在真好！ 2 𠊎想愛去上主个聖殿，想到昏掉；𠊎愛用全部个身心大聲頌讚永生个上帝。 3 上主—萬軍个元帥、𠊎个王、𠊎个上帝啊，在你个祭壇堘頭，連屋簷鳥也為自家做藪，燕仔也尋到孵子个所在。 4 住在你聖殿肚个人實在有福氣噢！佢等一直在該位讚美你。 5 倚靠你得到氣力、熱心愛去錫安山朝聖个人，佢等實在真有福氣噢！ 6 佢等經過燥燥个山壢，它就變做泉水之地；連秋雨也落下來，使山壢到處成做陂塘。 7 佢等越行越有氣力，最後會到錫安朝見至尊个上帝。 8 主上帝—萬軍个元帥啊，求你聽𠊎个祈禱！雅各个上帝啊，求你側耳來聽！ 9 上帝啊，求你看顧𠊎等个盾牌；求你照顧你所選立个王！ 10 在你个聖殿住一日，贏過在別位住千日；𠊎甘願企在𠊎上帝聖殿个門口，也無愛住在邪惡人个帳篷肚。 11 因為主上帝係日頭，係盾牌；佢會賜恩惠㧯尊榮給𠊎等。上主毋會將最好个留等毋給該兜行為正直个人。 12 上主—萬軍个元帥啊，信靠你个人實在有福氣噢！