Bible

Psalms 83

Chinese (T) - TNV2012

1 上帝啊，求你毋好恬恬毋開嘴！上帝啊，求你毋好恬恬毋出聲！

2 看啊，你个仇敵這下當造反；怨恨你个人頭那昂到高高。

3 佢等陰謀愛同你个子民作對；佢等設計陷害你所庇佑个人。

4 佢等講：「來啊，來消滅佢等个國家，使以色列个名永遠無人再紀念！」

5 佢等同心共下參詳，彼此結盟愛反抗你：

6 就係以東人、以實瑪利人，還有摩押人㧯夏甲人，

7 有迦巴勒人、亞捫人、亞瑪力人，同時還有非利士人㧯泰爾人。

8 亞述人也同佢等勾結，做羅得後代个聯盟。

9 求你對付佢等，像對付米甸人一樣，像在基順河滣對付西西拉㧯耶賓。

10 你在隱‧多珥將佢等消滅；佢等个身屍在地上糜掉。

11 求你對付佢等个將軍，像對付俄立㧯西伊伯；也消滅佢等个統治者，像消滅西巴㧯撒慕拿；

12 因為佢等講：「𠊎等來去搶，來去佔該屬上帝个土地。」

13 𠊎个上帝啊，打散佢等，像吹散塵灰；求你使佢等像礱糠被風捲走一樣。

14 像火燒光樹林，火焰燒遍山嶺，

15 照樣，求你用狂風來追佢等，用暴雨來使佢等驚到會死。

16 上主啊，求你使佢等滿面見笑，恁樣，佢等正會承認你偉大个名。

17 願佢等永遠失敗著驚！願佢等在羞辱中滅亡！

18 願佢等知：只有你—上主，係全地个至高者！