Bible

1 上主啊，你一直顧念你个土地；你識俾以色列重建家園。 2 你赦免你子民个罪，饒佢等一切个過犯。 3 你無再對佢等發譴；你收轉你个大發譴。 4 救𠊎等个上帝啊，復興𠊎等；求你停止你對𠊎等个憤怒！ 5 敢講你愛永遠對𠊎等發譴？敢講你愛譴到世世代代嗎？ 6 求你再一擺俾𠊎等強盛起來；你个子民就會頌讚你。 7 上主啊，對𠊎等顯出你不變个慈愛；懇求你將你个拯救賜給𠊎等。 8 𠊎愛聽主上帝所講个話。佢應許愛賜平安給佢忠心个子民，總係佢等做毋得倒轉去行戇路。 9 佢定著會救該兜敬畏佢个人；佢个榮光會充滿𠊎等个土地。 10 慈愛㧯忠心互相迎接；公義㧯和平彼此相親。 11 人个忠心對地上生出；上帝个公義對天頂顯現。 12 上主愛使𠊎等盡富足；𠊎等个土地會有豐收。 13 公義會行在上主面前，為佢預備愛行个道路。