Bible

Psalms 30

Chinese (T) - TNV2012

1 上主啊，𠊎愛稱你做至高个，因為你識對深淵救𠊎出來，毋俾敵人對𠊎誇口。

2 上主—𠊎个上帝啊，𠊎求你幫助，你就醫好𠊎。

3 上主啊，你識將𠊎對陰間救上來，又恢復𠊎个生命，毋使落陰府。

4 上主忠心个子民啊，愛歌頌佢；你等愛感謝至聖者个聖名！

5 因為，佢个怒氣一下就過掉；總係，佢个恩典透到一生人。雖然歸暗晡目汁濫泔，天一光就有歡喜快樂。

6 𠊎識心神在在講：「𠊎永遠毋會搖動。」

7 上主啊，因為你識恩待𠊎，你就使𠊎像高山企到在在；總係，你揞等面毋搭𠊎，𠊎就愊愊掣無葛無煞。

8 上主啊，𠊎求喊你；𠊎懇求你幫助，講：

9 「𠊎流血到死有麼介好處呢？𠊎入墳墓敢有較好嗎？變做泥个人敢還會頌讚你？死人敢會傳揚你个信實嗎？

10 上主啊，聽𠊎求，憐憫𠊎！上主啊，求你來幫助𠊎！」

11 你將𠊎个悲傷變做歡喜跳舞；你使𠊎脫掉麻衫，著快樂靚衫。

12 恁樣，𠊎毋敢恬恬，𠊎愛唱歌頌讚你；上主—𠊎个上帝啊，𠊎愛永遠感謝你！