Psalms 31
1 上主啊，𠊎尋求你个庇佑；求你永遠莫俾𠊎見笑。你係公義个上帝；求你一定愛救𠊎！
2 求你聽𠊎祈求，遽遽來拯救𠊎！求你做𠊎个磐石來保護𠊎，求你做𠊎个城堡來拯救𠊎。
3 你係𠊎个磐石，𠊎个城堡；求你因為你个名帶領𠊎。
4 救𠊎脫離害𠊎个羅網，因為你係𠊎个避難所。
5 𠊎將𠊎个靈魂交在你个手中；上主—信實个上帝啊，你係一直救贖𠊎个。
6 𠊎惱死該兜拜假神个人；總係𠊎的確信靠上主。
7 因為你不變个慈愛，𠊎愛歡喜快樂。你看到𠊎个痛苦，知𠊎心神个艱難。
8 你毋識俾𠊎落在仇敵个手中；你使𠊎企在安全又闊个地方。
9 上主啊，求你憐憫𠊎，因為𠊎在患難中；𠊎噭到目珠腫腫，身體靈魂也枯燥。
10 𠊎个生命緊愁緊弱；𠊎个壽年緊噌緊少。患難害𠊎緊來緊無元氣；𠊎个骨頭也緊來緊硬鉸。
11 該兜仇敵全部侮辱𠊎，連隔壁鄰舍也嘲謔𠊎；知己个朋友盡驚見𠊎，在路上堵到𠊎就閃走。
12 𠊎像已經過身个人，無人記得𠊎，顧念𠊎；𠊎就像打爛个缶仔。
13 𠊎聽到盡多譭謗个話，周圍充滿得人驚个聲。佢等共下參詳愛害𠊎，陰謀愛收掉𠊎个性命。
14 總係，上主啊，𠊎信靠你；𠊎講：「你係𠊎个上帝！」
15 𠊎一生人个事完全在你个手中；求你救𠊎脫離敵人㧯迫害𠊎个人。
16 求你个面光照你个僕人；求你照你不變个慈愛拯救𠊎。
17 上主啊，𠊎已經對你求喊；求你毋好使𠊎堵到見笑。求你使邪惡个人堵到見笑；願佢等落陰間，全無話好講。
18 願你塞等該兜講花撩个人个嘴；使驕傲、自誇、攻擊義人个恬下來。
19 你為敬畏你个人所存个，你為倚靠你个人所行个，在世間人个面前，實在好到講毋掉！
20 你將佢等囥在你面前安全个所在，免得佢等堵到敵人个暗算；你保守佢等在你个屋肚，免得佢等被人咒罵。
21 愛頌讚上主！𠊎在城肚被人圍困个時，佢對𠊎顯出奇妙个慈愛！
22 上主啊，𠊎心肝著急个時識講：「𠊎對你个面前被你逐到遠遠」；總係𠊎一求你幫助，你就施恩聽𠊎求喊。
23 上主忠心个子民啊，你等愛敬愛上主！上主保佑對佢誠心个子民，總係嚴嚴責罰行事驕傲个人。
24 所有仰望上主个人啊，你等愛剛強，也愛勇敢！