1上主就係𠊎个避難所。你等樣般做得對𠊎講：「你愛像鳥仔飛入深山，2因為該兜壞人開弓搭箭，愛暗中射心肝正直个人。3根基若係被人毀滅，義人還能做麼介呢？」4上主在佢个聖殿當中；上主个寶座設在天頂。佢个目珠看等世間人，鑒察佢等个所行所做。5上主考驗義人㧯壞人；佢當怨恨好強暴个人。6佢愛將石炭火㧯硫磺火降在壞人身上，用熱死人个燒風來報應佢等。7上主係公義个，佢歡喜公正个行為；正直个人一定會朝見佢个面。