Bible

1 上主啊，你做麼介企到恁遠呢？在患難个時，你做麼介毋出面？ 2 壞人因為驕傲迫窮苦人到無路好走；願佢等陷落在自家所設个羅網底背。 3 壞人誇口自家邪惡个慾望；貪心个人拒絕並藐視上主。 4 壞人將佢个面傲到高高，講：「上主毋會尋𠊎算數，事實上乜無上帝啊！」佢心中所想个就係恁樣。 5 壞人个行事常常順利。佢無了解上帝个審判；佢嘲謔佢所有个對敵。 6 佢心肝想：「𠊎永遠毋會失敗；𠊎世世代代毋會堵到災難。」 7 佢滿嘴咒罵、詭詐、喝喝咄咄，舌乸好講怨恨㧯邪惡个話。 8 佢埋伏在村莊个底背；佢等機會殺害無罪个人。佢个目珠偷看無倚靠个人， 9 佢像獅仔埋伏在草藪肚；佢等機會愛捉窮苦人，網到以後就將佢捉去。 10 窮苦人在佢个壓迫之下，只有低頭降服佢个暴力。 11 壞人心肝想：「上帝毋記得了；佢揞等目珠，永遠看毋到𠊎！」 12 上主啊，求你䟘起來！上帝啊，好出手了！莫毋記得受苦个人！ 13 壞人做麼介敢藐視上帝，心肝講：「佢毋會尋𠊎算數」？ 14 其實，一切在你个鑒察中；你出手關心苦難㧯憂愁。窮苦無倚靠个人投靠你；你一直就係幫助孤兒个。 15 求你消滅惡人㧯壞人个勢力；求你責罰佢等个罪，徹底算數。 16 上主永永遠遠做王掌權；外邦會對佢个土地消滅。 17 上主啊，你已經聽到窮苦人个心願；你會加添佢等个勇氣，聽佢等祈禱。 18 你會代孤兒㧯受壓迫个伸冤，使世間人毋會再過恐嚇別人。