Psalms 103
1 𠊎个心啊，愛頌讚上主！𠊎个身心靈愛頌讚佢个聖名！
2 𠊎个心啊，愛頌讚上主！毋好毋記得佢一切个恩惠！
3 佢赦免𠊎所有个罪惡；佢醫好𠊎一切个病痛。
4 佢救𠊎脫離死亡；佢用慈愛㧯憐憫做𠊎个冕旒。
5 佢用最好个東西來滿足𠊎，使𠊎一直青春，勇健像鷹鳥。
6 上主代受壓迫个伸冤；佢為到佢等伸張公義。
7 佢對摩西啟示佢个計劃，使以色列人知佢个作為。
8 上主有憐憫㧯恩典，無隨便發譴，滿有不變个慈愛。
9 佢毋會一直責備；佢毋會永遠發閼。
10 佢無照𠊎等个罪過責罰𠊎等；佢也無因為𠊎等个罪惡報應𠊎等。
11 天離地有幾高，對敬畏佢个人，佢个慈愛也有幾大！
12 東離西有幾遠，佢使𠊎等个過犯離開𠊎等也有恁遠！
13 阿爸係樣般痛惜自家个子女，上主也樣般痛惜敬畏佢个人。
14 佢知𠊎等个本質；佢記得𠊎等不過係泥做个。
15 論到世人，佢等个生命就像草。佢等像野地个花，生到恁靚；
16 被風一吹就無掉去，無人再尋得到它。
17 總係上主个慈愛歸給敬畏佢个人，對上古到永遠；佢个公義也歸給佢等个子子孫孫，
18 就係該兜誠心守佢个契約、忠實遵行佢誡命个人。
19 上主在天頂設寶座；佢做王統治所有个一切。
20 大有能力个天使啊，聽佢命令、順從佢旨意个使者啊，你等愛頌讚上主！
21 天頂一切有權能、遵行佢旨意个奴僕啊，你等愛頌讚上主！
22 一切佢所創造个啊，愛頌讚上主！愛在佢統治个逐所在頌讚佢！𠊎个心啊，愛頌讚上主！