Psalms 102
1 上主啊，求你聽𠊎个祈禱；求你聽𠊎求喊个聲！
2 𠊎陷在患難中个時節，求你毋好揞等面毋搭𠊎！求你側耳來聽𠊎个祈禱；𠊎求你个時節，遽遽應𠊎！
3 𠊎个年日像煙恁樣消失；𠊎个骨頭像在爐中燒等个火炭。
4 𠊎个心受傷，像草燥掉；𠊎甚至連食飯也毋記得。
5 𠊎透大氣緊噌，歸身只有皮包骨。
6 𠊎像曠野个鳥仔，像野地个貓頭鳥。
7 𠊎一直睡毋落覺；𠊎像屋頂孤單个鳥仔。
8 𠊎个仇敵從早到暗辱罵𠊎；㩢耍𠊎个人指等𠊎來咒詛。
11 𠊎个年日像臨暗个身影，也像草轉黃燥掉。
12 總係，上主啊，你永遠掌權；你个名被人紀念直到萬代。
13 你一定會䟘起來憐憫錫安，因為你憐憫它个時節到了，你所定个時間已經成熟了。
14 該兜石頭係你个僕人所歡喜个；連城中个泥也係佢等所痛惜个。
15 天下萬國定著會敬畏上主个名；地上萬王會因為佢个榮光著驚。
16 上主重建錫安个時節，佢个榮光會顯明出來。
17 佢愛垂聽窮苦人个求喊；佢毋會藐視佢等个祈禱。
18 愛為後代將上主个作為記錄下來，俾該兜還吂出世个人曉得頌讚佢。
19 上主對至高个聖所看下來；佢對天頂觀察人間个一切。
20 佢聽該兜犯人个噌聲；佢透放被人判死刑个。
23 上主縮短𠊎个年日，使𠊎未老先衰。
24 𠊎講：「𠊎个上帝啊，毋好使𠊎中年過身。」上主啊，你萬世永存！
25 你在上古定大地个根基；諸天也係你親手創造个。
26 天地會消滅，總係你永遠長存；它兜會像衫褲爛掉恁樣消失。你愛改變天地，像換衫一樣；它兜就會消失。
27 總係，你永遠毋會改變；你个壽年無窮無盡。
28 你這兜僕人个子孫會安居樂業；佢等个後代會堅立在你面前。