Psalms 104
1 𠊎个心啊，愛頌讚上主！上主—𠊎个上帝啊，你真偉大！你著等榮光㧯威嚴；
2 你用光做長袍披等。你安設穹蒼，像搭帳篷一樣；
3 你在高天个水面頂起住所。你用雲做戰車，藉風个翼胛來飛。
4 你用風做使者，用𥍉爧做僕人。
5 你將大地安在堅固个根基頂高，使它永遠毋會搖動。
6 你用大海像外袍包等地面；大水就將群山淹等。
7 你大聲一咄，水就趕緊退走；你大聲一喝，水就瀉走。
8 大水越過山嶺，流入山壢，到你為它兜設定个所在。
9 你劃定界限，毋准水弛過來，喊它兜毋好再將大地淹等。
10 你使泉水在山壢湧出，在群山中間流等下。
11 走獸有水好啉，野驢有好止渴。
12 飛鳥在水邊做藪，在樹枝个中間唱歌。
13 你對天頂落雨在山嶺頂；因為你工作个結果，大地就豐足。
14 你使青草生出來，給頭牲食；你使青菜長大，給人做食物；你俾人在土地上耕種五榖：
15 焗酒來俾人心歡喜，製造油來滋潤面貌，做糧食來加添體力。
16 上主種在黎巴嫩个香柏樹，全部得到豐富个雨水滋潤。
17 鳥仔在該兜樹頂做藪；松樹頂也有白鶴个藪。
18 野山羊住在高山頂；石獾囥在石窿底背。
19 你造月光來定節令；日頭知幾時愛落山。
20 你使烏暗臨到，成做暗晡頭，樹林中所有个野獸就出來。
21 獅仔吼吼滾，出來打獵，愛尋上帝所賜个食物。
22 日頭一出，牠兜就閃走，倒轉山窿底背去睡目。
23 然後，人出去做事，勞勞碌碌到斷烏。
24 上主啊，你个創造實在真多！它兜全部係你用智慧造个；大地充滿你所創造个萬物。
25 該片有海，又大又闊，其中有無數个生物，大个細个全部都有；
26 海面有盡多船來來去去，你造个大海怪在海肚搞水。
27 牠兜全部係倚靠你，靠你照時供給食物。
28 你賜麼介給牠兜，牠兜就領受；你个手一打開，牠兜就得到飽足。
29 你若係揞面毋搭牠兜，牠兜就著驚；你收轉牠兜个氣，牠兜就死掉，歸土。
30 你對牠兜歕氣，牠兜就受造；你使大地時常換新。
31 願上主个榮光永遠長存！願上主歡喜自家所造个！
32 佢看大地，地就震動；佢摸群山，山就出煙。
33 𠊎一生人愛唱歌來讚美上主！𠊎有生之日愛歌頌𠊎个上帝！
34 願佢因為𠊎个詩歌歡喜，因為𠊎个快樂係對佢來。
35 願罪人對世間消滅；願壞人毋會再出現。𠊎个心啊，愛頌讚上主！哈利路亞！