Proverbs 19
1 行為無好嫌个窮苦人，贏過講話詭詐个戇仔。
2 熱心無智識盡毋好；行動忒遽容易行錯。
3 人个愚戇敗壞佢个前途；佢个心肝反轉埋怨上主。
4 錢財多朋友增加；窮苦人朋友遠離。
5 做假見證个，會受責罰；好講花撩个，難逃罪責。
6 地位高貴个，多人求佢个恩情；大方施捨个，大家㧯佢做朋友。
7 人窮兄弟乜毋搭，朋友走到還較遠；逐等去開聲盡喊，佢等已經走淨淨！
8 得到智慧个，愛惜生命；持守聰明个，幸福無窮。
9 做假見證个，會受責罰；好講花撩个，自取滅亡。
10 戇人享安樂係無合適；奴才管頭家較無適當。
11 人有見識，無隨便發譴；饒赦過失，自家有榮光。
12 君王發譴，像吼吼滾个獅仔；君王施恩，像青草上个甘露。
13 戇檔个孻仔成做阿爸个災禍；吵鬧个𡜵娘像屋頂漏雨緊滴。
14 房屋㧯財產係祖先留下个；賢慧个𡜵娘係上主所賜个。
15 懶尸个人好睡目；閒亍亍个餓肚笥。
16 遵守上帝誡命个，會保守生命；看輕上主道路个，一定會滅亡。
17 救濟窮人，就係借錢給上主；佢个好行為，上主會報答佢。
18 還有盼望个時，愛管教你个子女；總係毋好忒嚴，驚怕害佢等一生。
19 脾氣暴烈个人，必定受刑罰；你若愛救佢，必須一救再救。
20 愛聽人勸話，接受指導；你最後會成做智慧人。
21 謀事在人，成事在天。
22 做人忠誠係人所渴慕个；窮苦人贏過花撩牯。
23 敬畏上主个人，享受長壽；佢會永久安居，遠離災難。
24 懶尸人伸手拿盤肚个食物，懶到連跔手送落嘴乜毋肯。
25 責打傲慢人，戇直人就學到精明；勸話聰明人，佢就得到智識。
26 孻仔若苦毒爺仔、逐走𡟓仔，係帶來見笑、羞辱个不孝子。
27 孻仔啊，你若毋接受管教，就會失落智識个言語。
28 奸詐个證人看公義做笑話；邪惡个人將不義食到滿嘴。
29 審判係為傲慢人來準備个；鞭刑係為戇人个背囊設个。