Proverbs 20
1 淡酒害人傲慢，釅酒害人胡鬧；好酒行差路个人，實在無智慧。
2 王个發譴像獅仔大聲嘶；惹王受氣喪失自家生命。
3 人能避免紛爭就係光榮；戇人全部盡好惹人冤家。
4 懶尸个耕種人無照節氣；收成个時佢就一無所得。
5 人个心思像深井肚个水，聰明人正知樣般打出來。
6 盡多人自誇做人忠誠，總係麼人尋得到正經信實个人呢？
7 正直个人行事完全純正，佢个子孫係樣般有福氣！
8 君王坐在審判台頂高，厥目珠鑒察一切邪惡。
9 麼人敢講：「𠊎已經洗淨𠊎个心，𠊎係純潔無罪个」？
10 用兩種秤仔、兩樣升斗來騙人，這係上主盡惱个。
11 細人仔个品行係純潔係正直，對佢个行為乜可以看得出來。
12 會聽个耳公，會看个目珠，兩樣都係上主所創造个。
13 毋好貪睡，正毋會變窮苦；煞猛做事，就會得到飽足。
14 買貨嫌貨：「毋好！毋好！」買轉就講：「盡好！盡好！」
15 黃金萬兩，珠寶滿箱，毋當一句智慧良言。
16 麼人為生份人擔保，你就愛拿佢个外衫做抵押；麼人為外族人擔保，你就愛喊佢承擔一切後果。
17 騙來个食物特別好食；過後就感覺滿嘴砂石。
18 有計劃个事一定成功；無策略个戰爭毋好打。
19 多講閒話，難守祕密；多嘴朋友，毋好結交。
20 咒罵爺𡟓个人，佢个生命會像燈火在烏暗中烏掉。
21 忒早繼承祖公業，最尾對佢毋係福。
22 你毋好講：「𠊎愛報仇！」你愛等候上主，佢會為你伸冤。
23 無準个秤砣，上主盡惱；詭詐个秤仔，十分毋好。
24 人个腳步係上主所安排个；麼人能知佢人生个道路呢？
25 向上帝許願前愛三思，免得後來會陷入羅網。
26 智慧个王簸出壞人，就用碌碡來碾佢等。
27 上主个燈鑒察人个心，查明心底一切个念頭。
28 仁慈㧯信實係君王个保障；佢也用仁慈穩固佢个政權。
29 身強力壯係後生人个榮耀；白頭那毛係老人家个尊榮。
30 嚴刑除掉人个罪惡；鞭打洗淨人个內心。