Proverbs 18
1 孤老个人關心自家定定；別人好个意見，佢總愛反對。
2 戇檔人無歡喜智識；單單好展自家定定。
3 邪惡來，侮辱跈等來；見笑到，羞恥共下到。
4 口中个言語像大海恁深；智慧个泉源像溪水湧流。
5 縱容邪惡係不公；冤枉無辜乜不義。
6 戇人講話引起爭端；佢一開嘴就惹人打。
7 戇檔人个嘴敗壞佢自家；厥嘴唇係佢生命个陷阱。
8 背後个閒話像食滂沛；一落嘴就吞到腸肚去。
9 懶尸做事个㧯言行敗壞个，係好兄弟。
10 上主个名係堅固个城堡；義人走入去就得到安全。
11 好額人將佢个財富看做城堡，恅到係高大堅固个銅牆鐵壁。
12 敗壞先前，人心驕傲；尊榮以前，必有謙卑。
13 吂聽清楚，就搶先回答，這係戇檔，會堵到見笑。
14 求生存个心志，能忍受病痛；意志若係消沉，麼人捱得過？
15 聰明人个心愛得智識；智慧人个耳公求智識。
16 人个禮物為佢開路，𢱋佢到大人物面前。
17 先告狀个，看像有理；對方來到，查出是非。
18 抽籤可以平息冤家，也能解開兩強纏鬥。
19 兄弟結冤仇，當像堅固个城牆盡難破；恁樣个爭吵，像城堡閂等个門盡難通。
20 人講話所帶來个結果，大大影響佢个一生；人个話所產生个果效，會使佢食到飽飽。
21 或生或死，在舌乸个權下；好講話个，後果自家承受。
22 討到好𡜵娘十分幸福，也係得到上主个恩惠。
23 貧窮人个懇求，低聲下氣；有錢人个回答，十分魯夫。
24 酒肉朋友，情薄過紙；知己朋友，贏過兄弟。