Proverbs 17
1 有一口飯好食，全家平安，贏過滿桌滂沛，相爭𢲾背。
2 精明个僕人會管主人無像樣个子，還有好在佢等个兄弟中分到家業。
3 金銀受爐火鍛鍊；人心被上主考驗。
4 做壞个聽從奸詐个話；花撩牯好聽害人个話。
5 嘲謔窮苦人个，係侮辱造佢个主；恥笑別人受苦个，難免愛受責罰。
6 子孫係老人家个冕旒；爺𡟓係細人仔个光榮。
7 戇檔人講文雅个話無合宜；高貴人講花撩還較無合適。
8 不義个紅包，送个人看做萬能；佢恅到一切計謀个攏總會通。
9 赦免過錯，促進友愛；紀念舊恨，破壞友情。
10 對明理个人講一句責備个話，比打戇檔人一百下還較有效。
11 邪惡个人只有存心悖逆；嚴厲个使者會來對付佢。
12 寧可堵到失掉熊子个熊乸，毋愛堵到糊做亂來个戇人。
13 以惡報善个人，家庭不離災禍。
14 相爭一開始就像大水穿壆；所以相吵吂爆發前愛停止。
15 判惡人為義，定義人為惡，這兩項都係上主所惱个。
16 戇檔人拿錢買智慧敢有用？佢根本無心來學習！
17 朋友時常彼此相惜；兄弟出世分擔苦難。
18 只有無常識个人，正會㧯鄰舍擔保。
19 好犯罪个人歡喜紛爭；展風神个人惹來災禍。
20 心術無正个，尋毋到幸福；講話奸詐个，常堵到災難。
21 𫱔戇檔个孻仔，害阿姆憂傷；悖逆个孻仔，害阿爸無歡喜。
22 歡喜个心係一帖良藥；憂愁个靈害骨頭燥掉。
23 壞人暗中被人收買，害正義無法度伸張。
24 聰明人面向智慧；戇檔人昂頭妄想。
25 戇檔个孻仔害阿爸憂愁，乜害阿姆痛苦。
26 刑罰無罪个人係毋著个；鞭打正直个領袖乜毋著。
27 明理人講話細膩；聰明人頭腦冷靜。
28 憨蚩个人若無講話，也算有智慧；佢若係恬恬莫開嘴，也算有聰明。