Proverbs 16
1 謀事在人；成事在天。
2 人恅到自家所做个全著；總係上主審察佢个動機。
3 你所做个事愛交託上主；你所計劃个定著會成功。
4 上主所造个係愛達到各種个目的；甚至邪惡人乜係為患難个日造个。
5 上主當惱所有驕傲个人；佢等絕對無法閃避責罰。
6 忠誠信實，罪得赦免；敬畏上主，遠離壞事。
7 行為若得上主歡喜，主使仇敵成做朋友。
8 甘願行公義，收入少，贏過行不義，橫財多。
9 人心計劃自家个道路；總係上主引帶厥腳步。
10 君王个話有神啟示；佢个判斷毋會差錯。
11 公平个秤㧯磅屬於上主；袋肚个秤砣全係佢做个。
12 君王無法度忍受邪惡个事，因為政權係靠正義做根基。
13 君王歡喜聽正直个話；佢盡惜講誠實話个人。
14 君王个憤怒像死亡个使者；有智慧个會平息王个受氣。
15 君王个笑容使人有生命；佢个施恩像雲帶來春雨。
16 得智慧贏過得黃金；選聰明贏過選白銀。
17 正直人个道路遠離邪惡；謹慎行正路能保全生命。
18 驕傲在敗壞頭前；自大在跌倒以前。
19 存心謙卑㧯窮苦人來往，贏過㧯驕傲人平分搶來个錢財。
20 聽從教訓，必得好處；信靠上主，實在有福。
21 心中有智慧，稱做通達人；講話越文雅，越使人心服。
22 人有智慧就有生命个泉源；愚戇就係給戇檔人个責罰。
23 智慧人个心使佢个嘴通達，又俾佢講个話較使人心服。
24 親切个語言，像蜂糖共樣，使心靈甘甜，使身體強壯。
25 有一條路看來盡直；總係最尾透到死亡。
26 工人勞碌為口腹；口腹催佢多勞碌。
27 鱸鰻人圖謀惡事；講話像火燒傷人。
28 搬弄是非，製造紛爭；背後中傷，破壞友情。
29 強暴人迷惑鄰舍，引誘佢去行邪路。
30 目珠捩捩轉，心術毋好；沉毒毋講話，想做壞事。
31 白頭那毛係光榮个冕旒，經過公義个生活正得到。
32 無隨便發譴，贏過勇士；能管制自家，贏過搶城。
33 抽籤在人；決定在神。