Proverbs 15
1 應答溫和，平息憤怒；言語粗暴，惹人發譴。
2 智慧人个舌乸傳講智識；戇檔人个嘴唇吐出戇話。
3 上主个目珠看到逐所在；壞人㧯好人佢攏總鑒察。
4 溫和个舌乸帶給人生命；奸詐个話語會害人心碎。
5 戇檔人看輕阿爸个管教；聽從勸話个就係精明人。
6 正直人家中財產多多；邪惡人得利帶來煩勞。
7 智慧人个嘴宣揚智識；戇檔人个心毋係恁樣。
8 上主盡惱邪惡人个獻祭；佢當歡喜正直人个祈禱；
9 上主盡惱邪惡人个行為；佢當歡喜追求正義个人。
10 背離正道，愛受嚴嚴个責罰；拒絕勸話，一定會喪失生命。
11 陰間㧯滅亡都在上主鑒察下；世間人个心樣般能囥得住呢？
12 傲慢人無愛聽勸話；佢無愛親近智慧人。
13 心中喜樂，面帶笑容；心肚憂愁，心神損傷。
14 聰明人个心尋求智識；戇檔人个嘴豺食憨蚩。
15 困苦个人毋得晝暗；樂線个人逐日滂沛。
16 寧可財產無多，敬畏上主，贏過家財萬貫，煩勞不安。
17 單淨粗茶淡飯，大家相惜，贏過酒肉滿桌，彼此冤家。
18 脾氣火暴惹起爭端；心平氣和平息紛爭。
19 懶尸人个路竻藪塞塞；正直人个道平平順順。
20 智慧个孻仔使爺仔歡喜；戇戇个孻仔看輕厥𡟓仔。
21 無智識个人看愚戇做快樂；有見識个人照等正直行事。
22 無先參詳，一定失敗；大家研究，正會成功。
23 曉得應對，俾人爽快；講話合時，實在還好。
24 聰明人對生命个路上去，愛遠遠離開下背个陰間。
25 上主愛拆驕傲人个屋；佢愛保守寡婦个家產。
26 上主盡惱邪惡个陰謀；佢當歡喜純潔个言語。
27 貪愛橫財會害到自家个家庭；拒絕不義个紅包會享受長壽。
28 正直人三思以後正答應人；邪惡人个嘴隨便吐出壞話。
29 上主離開邪惡人遠遠；佢愛聽正直人个祈禱。
30 歡頭喜面，人心滿足；聽好消息，筋骨爽快。
31 聽從造就人生命个責備，就會住在智慧人个中間。
32 拒絕管教，係看輕自家；聽從勸話，就得到智慧。
33 智慧教人敬畏上主；尊榮以前必有謙卑。