Numbers 21
1 住在南部个迦南人亞拉得王聽講以色列人愛行亞他林這條路來，就攻打佢等，捉走幾下儕。
2 所以以色列人向上主許願講：「若係你俾𠊎等打贏這兜人，𠊎等就無條件將佢等㧯佢等个城市奉獻給你，毀滅佢等个城。」
3 上主聽佢等个祈求，將迦南人交在佢等个手。所以以色列人徹底毀滅佢等㧯佢等个城市；該地方就喊做何珥瑪。
4 以色列人離開何珥山，向紅海个路行，為了係愛捩過以東地區。在路上，人民煩躁到講毋得；
5 佢等就怪怨上帝㧯摩西講：「做麼介將𠊎等𢱋出埃及、愛𠊎等死在這無好食又無水个曠野？𠊎等實在吞毋下這恁難食个東西了！」
6 所以上主喊毒蛇進入人民當中；當多以色列人被毒蛇咬死掉。
7 人民來見摩西，講：「𠊎等有犯罪，因為𠊎等怪怨上主㧯你。這下求你祈禱上主，使這兜蛇離開𠊎等。」摩西就為人民祈禱。
8 上主吩咐摩西鑄造一條銅蛇，掛在樹棍頂，被毒蛇咬到个人若係看到這蛇就毋會死。
9 所以摩西鑄造一條銅蛇，掛在樹棍頂。被毒蛇咬到个人一看到這銅蛇就毋會死。
10 以色列人再向前行，在阿伯安營。
11 離開阿伯以後，佢等在摩押地个東片、曠野底背个亞巴琳荒地安營，
12 後來又到撒烈山壢安營。
13 佢等對該位再向前行，在亞嫩山壢北片个曠野安營；這曠野直到亞摩利人个地界。(亞嫩山壢係摩押人㧯亞摩利人中間个界限。)
14 所以，《上主个戰記》上講：「……蘇法地區个哇哈伯城、亞嫩个山壢，
15 㧯伸入亞珥城直到摩押邊界个山崎。」
16 佢等對該位到一個名安到比珥个地方。上主在該位對摩西講：「你去召集人民，𠊎愛給佢等水啉。」
17 該時，以色列人唱恁樣个一首歌：「井啊，愛湧出水來；𠊎等愛唱歌慶祝。
18 這係領袖—民間个尊貴人用權杖㧯柺棍仔挖个井。」佢等對曠野徙到瑪他拿，
19 再對該位到拿哈列，再到巴末，
20 對巴末到摩押地个山壢，就係遠遠看得到曠野个比斯迦山頂。
21 以色列人派使者去見亞摩利人个王西宏，講：
22 「請准𠊎等經過你个地界。𠊎等㧯𠊎等个頭牲毋會離開大路、行到田肚抑係葡萄園去；𠊎等也毋啉你等井肚个水。𠊎等單淨行王个大路，一直通過你个土地。」
23 總係西宏毋准以色列人經過佢个土地。佢召集軍隊到曠野去，在雅雜攻打以色列人。
24 總係以色列人㓾掉佢㧯佢个軍隊，又佔領佢个土地，對亞嫩山壢向北直到雅博山壢，就係亞捫人个邊界，因為亞捫人有盡堅固个邊界防備。
25 以色列人佔領亞摩利人所有个城市，包含希實本㧯周圍个村莊；以色列人就住在該位。
26 希實本係亞摩利王西宏个首都；西宏識攻打以前个摩押王，佔領佢所有个土地，直到亞嫩山壢。
27 所以詩人講：「到西宏王个城希實本來！𠊎等愛看它重新起過。
28 因為有火對希實本城發出，有火焰對西宏个城出來，毀滅摩押个亞珥城，吞滅亞嫩山壢上游个山區。
29 摩押人啊，你等有災禍了！拜基抹个人啊，你等滅亡了！這神明迫你等个男人逃走，使你等个婦女被亞摩利王西宏捉去。
30 這下𠊎等射佢等，希實本直到底本就滅掉；𠊎等毀滅佢等，直到米底巴附近个挪法。」
31 所以以色列人住在亞摩利人个地方。
32 摩西派人去打探雅謝城；以色列人佔領雅謝㧯周圍个城鎮，將住在該位个亞摩利人逐走。
33 後來以色列人倒轉來，向巴珊个路去。巴珊王噩帶領軍隊到以得來攻打佢等。
34 上主對摩西講：「毋使驚佢！𠊎愛將佢、佢个人民、還有佢个土地全部交在你个手中。你樣般對待住在希實本个亞摩利王西宏，也愛照樣對待巴珊王。」
35 所以，以色列人㓾掉噩㧯佢該兜孻仔、還有佢所有个人民，一個也無留下，又佔領佢个土地。