Numbers 22
1 以色列人再向前行，在約旦河東岸个摩押平原、耶利哥个對面安營。
2 西撥个孻仔摩押王巴勒看到以色列人樣般對待亞摩利人，
3 又知佢等人多，佢㧯佢个人民就全部盡驚以色列人。
4 所以摩押人對米甸人个領袖講：「這群人無幾久就會將𠊎等周圍个東西全部毀滅掉，像牛仔食掉草場个草共樣。」摩押王巴勒
5 派使者去喊比珥个孻仔巴蘭來；巴蘭住在佢个故鄉、幼發拉底河附近个比奪。使者將巴勒个意思㧯佢講：「有一族人對埃及出來，遮滿地面，住在𠊎个堘頭。
6 佢等个人數比𠊎个人民較多，所以請你來，為𠊎咒詛佢等。恁樣𠊎正有可能打贏佢等，將佢等逐出𠊎个土地。𠊎知，你所祝福个，就會得福；你所咒詛个，就會受咒詛。」
7 所以，摩押人㧯米甸人个領袖帶等卜卦个禮金到巴蘭該位去，將巴勒个意思㧯佢講。
8 巴蘭對佢等講：「你等在這位過夜，天光日𠊎會㧯你等講上主對𠊎講麼介。」摩押該兜領袖就留在巴蘭該位過夜。
9 上帝臨到巴蘭該位，問佢：「㧯你共下个這兜人係麼人？」
10 巴蘭應上帝講：「摩押王巴勒派佢等來㧯𠊎講：
11 『對埃及出來个一族人，遮滿地面。你愛來為𠊎咒詛佢等，俾𠊎打贏佢等，將佢等逐走。』」
12 上帝對巴蘭講：「毋好㧯這兜人去，也做毋得咒詛以色列人，因為𠊎賜福給佢等。」
13 第二朝晨，巴蘭去見巴勒个使者，講：「你等轉去，上主毋准𠊎㧯你等去。」
14 佢等就轉去見巴勒，報告佢講：「巴蘭毋肯跈𠊎等共下來！」
15 所以巴勒另外派比上擺較多又較重要个使者去。
16 佢等去見巴蘭，將巴勒个意思㧯佢講：「請毋好受到麼介阻擋毋肯來！
17 𠊎會大大報答你，你無論要求麼介，𠊎一定會照恁樣做。請你來為𠊎咒詛這兜人。」
18 總係巴蘭應佢等講：「就算巴勒將佢王宮底背个金銀全部給𠊎，無論大細事，𠊎全部毋敢違背上主—𠊎上帝个命令。
19 總係請你等在這位過夜，像以前該兜人恁樣，𠊎愛知上主係毋係還有別个話愛㧯𠊎講。」
20 該暗晡，上帝臨到巴蘭該位，對佢講：「若係這兜人係來求你跈佢等去，你就準備跈佢等去，總係愛照𠊎个話去做。」
21 第二朝晨，巴蘭將馬鞍掛好在驢仔背頂，跈摩押該兜領袖共下去。
22 上帝無歡喜巴蘭跈佢等去。巴蘭騎驢仔、兩個僕人跈佢行，在路上，上主个天使企在路中央擋等。
23 驢仔看到上主个天使拿等劍企在該位，就離開路，閃到田肚去。巴蘭打驢仔，愛牠轉到路上。
24 後來上主个天使企在兩個葡萄園中間个狹路上，兩片全部係石牆。
25 驢仔看到上主个天使，就憑到牆，將巴蘭个腳靠傷；巴蘭又打驢仔。
26 上主个天使又去到頭前，企在一個當狹个地方，無縫好通過。
27 這擺，驢仔看到上主个天使，就伏下來。巴蘭發譴，用柺棍仔打驢仔。
28 該時，上主使驢仔講話，牠對巴蘭講：「𠊎對你做麼介事，你這三擺打𠊎呢？」
29 巴蘭對驢仔講：「因為你㩢耍𠊎！若係𠊎手中有刀，就會將你㓾掉！」
30 驢仔對巴蘭講：「𠊎毋係你從細所騎个驢仔嗎？𠊎以前識恁樣對待你嗎？」巴蘭講：「毋識！」
31 接等，上主使巴蘭看到佢个天使拿等劍企在該位，巴蘭就伏在地上。
32 上主个天使對佢講：「你做麼介這三擺打驢仔呢？𠊎來阻擋你个路，因為你毋應該去。
33 你个驢仔看到𠊎，三擺閃開；若係牠無閃開，𠊎早就將你㓾掉，留驢仔个命。」
34 巴蘭對上主个天使講：「𠊎有罪了；𠊎毋知你企在路中央擋𠊎。若係你認為𠊎毋應該去，𠊎就倒轉去。」
35 上主个天使對巴蘭講：「跈這兜人去啊！總係你一定愛照𠊎喊你講个話去講。」巴蘭就跈巴勒个使者去。
36 巴勒聽講巴蘭來了，就到亞珥城去迎接佢；這城在摩押邊界亞嫩山壢个堘頭。
37 巴勒對巴蘭講：「𠊎第一擺恁積極派人去請你个時，你樣般毋肯來呢？你恅到𠊎毋會大大報答你係麼？」
38 巴蘭講：「𠊎毋係已經來了？這下，𠊎做得講麼介呢？𠊎只有做得講上帝愛𠊎講个話。」
39 巴蘭跈巴勒到胡瑣城。
40 巴勒在該位㓾牛羊，將肉送給巴蘭㧯跈佢共下來該兜領袖。
41 第二朝晨，巴勒帶巴蘭上到巴莫‧巴力去；對該位巴蘭看到部份个以色列人。