Numbers 20
1 正月，以色列全會眾來到尋曠野，在加低斯安營。美莉安死在該位，就葬在該位。
2 佢等安營个地方無水，人民聚集向摩西㧯亞倫計較，
3 對摩西發怨言講：「以前𠊎等个同胞以色列人識死在上主个聖帳篷前；𠊎等甘願㧯佢等共下死！
4 你等做麼介𢱋𠊎等—上主个會眾—到這曠野來？敢係愛𠊎等㧯頭牲共下死在這位？
5 你等做麼介𢱋𠊎等離開埃及，到這無出產个地方來呢？這位無五榖、葡萄、無花果、石榴；連水乜無好啉！」
6 摩西㧯亞倫離開會眾，企在聖帳篷門口。佢等伏在地上；上主个榮光向佢等顯現。
7 上主對摩西講：
8 「將約櫃頭前該支柺棍仔擎來。你㧯若哥亞倫愛召集全會眾，在佢等眼前命令磐石，水就會對磐石流出來。恁樣，你做得俾人民㧯頭牲啉對磐石流出來个水。」
9 摩西照上主个命令去將柺棍仔對佢个面前擎來。
10 摩西㧯亞倫召集全會眾到磐石前。摩西講：「你這兜叛徒聽好！𠊎等應該喊磐石流出水來給你等啉係麼？」
11 然後，摩西擎起柺棍仔，打磐石兩下，當多个水流出來。會眾㧯頭牲全部有水好啉了。
12 總係，上主責備摩西㧯亞倫，講：「因為你等信心無罅，在以色列人眼前無尊𠊎為聖，你等做毋得𢱋佢等進入𠊎應許賜給佢等个土地。」
13 這事發生在米利巴泉水滣；以色列人在該位怪怨上主，上主在佢等當中顯明自家係神聖个。
14 摩西對加低斯派使者去見以東王，對佢講：「你个親屬以色列人有話對你講。你知𠊎等所堵到个困難。
15 𠊎等个祖先樣般到埃及去；𠊎等在該位住當多年。埃及人苦毒𠊎等个祖先㧯𠊎等，
16 𠊎等就求喊上主。上主聽𠊎等个哀求，派天使將𠊎等𢱋出埃及。這下𠊎等到你邊界个加低斯城，
17 請俾𠊎等經過你个土地。𠊎等㧯𠊎等个頭牲毋會離開大路、行到田肚抑係葡萄園去；𠊎等也毋啉你等井肚个水。𠊎等單淨行王个大路，無偏左右，一直通過你个土地。」
18 總係，以東王應講：「𠊎毋准你等經過𠊎个土地！若係你等來，𠊎就派兵攻打你等。」
19 以色列人講：「𠊎等單淨行大路。若係𠊎等抑係𠊎等个頭牲啉你个水，𠊎等會付錢。𠊎等借過定定。」
20 以東王又講：「做毋得！」所以，佢派出精良个大軍來，愛攻打以色列人。
21 因為以東王拒絕以色列人通過佢个土地，以色列人就轉向另外一條路去。
22 以色列全會眾離開加低斯，來到何珥山；
23 這山在以東个邊界。上主在該位對摩西㧯亞倫講：
24 「亞倫做毋得進入𠊎應許給以色列人个土地；佢就會轉到厥祖宗該位去，因為你等兩儕在米利巴泉水滣違背𠊎个命令。
25 你愛帶亞倫㧯佢个孻仔以利亞撒上何珥山，
26 在該位脫掉亞倫个祭司衫，給以利亞撒著好。亞倫就會死，轉到厥祖宗該位去。」
27 摩西照上主个命令去做。佢等在全會眾面前上何珥山。
28 摩西脫掉亞倫个祭司衫，給以利亞撒著好。亞倫就死在該山頂；摩西㧯以利亞撒下山。
29 以色列全會眾知亞倫死掉，就為佢哀傷三十日。