Numbers 19
1 上主命令摩西㧯亞倫，
2 吩咐以色列人遵守以下條例：「愛牽一隻無缺點、無掛過軛个赤牛乸，
3 交給祭司以利亞撒，然後將赤牛乸牽到營外，在佢面前㓾掉。
4 祭司以利亞撒一定愛用手指搵這牛个血，向聖帳篷个方向拂七擺。
5 歸隻牛乸，連皮、肉、血、腸仔，全部愛在祭司面前燒掉。
6 然後，祭司愛拿一垤香柏樹、一支牛膝草，㧯一條深紅色个線㧹入火底背。
7 事後，祭司愛洗淨衫褲，用水洗身，正做得入營地；直到臨暗仔，佢在禮儀上係無淨浰个。
8 燒牛乸个人也一定愛洗淨衫褲，用水洗身；共樣，直到臨暗仔，佢在禮儀上係無淨浰个。
9 然後一個在禮儀上淨浰个人愛收牛乸个灰，放在營外一個淨浰个地方。這灰愛保存在該位，拿來為以色列會眾做除垃圾个水用个。執行這禮儀个目的係愛除罪。
10 收牛乸灰个人也一定愛洗淨衫褲，直到臨暗仔，佢在禮儀上係無淨浰个。這條例愛成做以色列人㧯住在佢等當中个外族人永遠个例規。」
11 「憑到屍體个人在禮儀上就七日無淨浰。
12 佢一定愛在第三日㧯第七日用水潔淨自家；恁樣，佢就淨浰了。若係佢無在第三日㧯第七日潔淨自家，佢就係無淨浰个。
13 憑到屍體又無去潔淨自家个人係無淨浰个，因為除垃圾个水無洒在佢个身上。佢打垃圾上主个聖帳篷，一定愛對上帝个子民中除名。
14 「有人死在帳篷肚，當時在帳篷肚个人㧯行入帳篷个人就七日無淨浰。
15 帳篷肚該兜無蓋仔个用品㧯鑊仔也無淨浰。
16 有人在屋外背憑到被人㓾死抑係自然死掉个人，或者憑到死人个骨頭抑係墳墓，佢就七日無淨浰。
17 「你等愛拿赤牛乸个灰，就係燒好做除罪用个，放在鑊頭肚，加淨水，為無淨浰个人除掉垃圾。
18 最先，一個淨浰个人愛拿一支牛膝草搵在水肚，洒在帳篷㧯帳篷肚所有个東西㧯人身上。然後，淨浰个人愛洒水在該憑到死人骨頭、屍體，抑係墳墓个人身上。
19 在第三日㧯第七日，該淨浰个人愛洒水在無淨浰个人身上。第七日，佢愛潔淨該人；該人愛洗淨衫褲，用水洗身，做好以後，等日頭落山，佢就淨浰了。
20 「有人在禮儀上無淨浰又無潔淨自家，佢還係無淨浰个，因為除垃圾个水無洒在佢身上。佢打垃圾上主个聖帳篷，一定愛對上帝个子民中除名。
21 你等愛世世代代遵守這條例。該洒水除垃圾个人也愛洗淨衫褲；所有憑到該水个人直到臨暗仔攏總無淨浰。
22 無淨浰个人所憑到个東西也全部無淨浰；憑到這兜東西个人，直到臨暗仔攏總無淨浰。」