Numbers 18
1 上主對亞倫講：「你㧯你該兜孻仔、還有利未人，一定愛承擔所有犯到聖所个罪；總係只有你㧯你該兜孻仔愛承擔犯到祭司職務个罪。
2 你愛帶你个親族—利未支族个人來，使佢等㧯你共下事奉。當你㧯你該兜孻仔在約櫃个聖帳篷事奉个時，佢等愛幫助你。
3 佢等愛向你負責，在聖帳篷底背服務，總係絕對做毋得摸到聖所㧯祭壇頂个聖物，免得佢等㧯你等全部死掉。
4 佢等愛㧯你共下工作，負責聖帳篷底背个事務；總係其他資格毋合个人做毋得㧯你等共下工作。
5 只有你㧯你該兜孻仔負責聖所㧯祭壇个工作。恁樣，𠊎就毋會再向以色列人發譴。
6 𠊎自家對以色列人中揀選你个親族利未人賜給你等。佢等愛歸𠊎，在聖帳篷底背做事。
7 只有你㧯你該兜孻仔應該負責有關祭壇㧯至聖所个祭司職務。這係你等个責任，因為𠊎將祭司个職務賜給你等。其他个人若行近聖物，一定愛處死刑。」
8 上主對亞倫講：「𠊎愛將所有獻給𠊎个特別个禮物，就係該兜毋使在祭壇頂燒掉个祭物，全部賜給你。𠊎將這兜祭物給你㧯你个後代，成做你等永久个份額。
9 該兜毋使在祭壇頂燒掉个至聖祭物，就係該部份對素祭、贖罪祭、㧯贖過失祭个祭物愛歸給你等。所有獻給𠊎个至聖祭物全部歸你㧯你个子孫。
10 你等一定愛在聖所食這兜東西，只有男人做得食。這兜東西係聖个。
11 「另外，以色列人獻給𠊎个其他特別供物、搖祭也愛歸給你等。𠊎愛將它兜給你㧯你个子女，做世世代代應得个份額。你等屋下在禮儀上淨浰个人，逐儕全部做得食。
12 「以色列人將逐年頭一擺出產中最好个獻給𠊎，𠊎愛將這兜橄欖油、酒、㧯五榖賜給你等。
13 這兜全部歸給你等。你等屋下在禮儀上淨浰个人，逐儕全部做得食。
14 「在以色列所有無條件獻給𠊎个祭物，全部屬你等。
15 「以色列人獻給𠊎个長子㧯頭胎个頭牲也全部屬你等；總係你等一定愛將每一個長子贖轉去，也愛將無淨浰个頭胎頭牲贖轉去。
16 細人仔愛在一隻月大个時贖轉去，照聖所規定个標準付五隻銀幣。
17 總係頭胎个牛、綿羊㧯山羊做毋得贖轉去；牠兜愛完全歸𠊎，成做牲祭。你愛將牠兜个血洒在祭壇頂，燒牠兜个油，成做清香个火祭獻給𠊎—上主。
18 牠兜个肉歸給你等，像搖祭个胸脯肉㧯右後腿歸你等共樣。
19 「𠊎愛將以色列人獻給𠊎所有个特別祭物，賜給你㧯你个子女，做世世代代應得个份額。這係𠊎㧯你還有你个後代所立毋會廢掉个約。」
20 上主對亞倫講：「你做毋得接受以色列人傳給子孫个產業，做毋得在佢等个土地上有份。𠊎係上主；𠊎係你个份額、你个產業。」
21 上主講：「𠊎已經將以色列人獻給𠊎个十分之一給利未人。這係佢等管理聖帳篷个代價。
22 其他以色列人做毋得再接近聖帳篷，免得犯罪致死。
23 對這下開始，只有利未人做得管理聖帳篷，負責聖帳篷底背个所有事務。這係你等世世代代愛遵守个條例。利未人在以色列人中做毋得有永久个產業，
24 因為𠊎已經將以色列人獻給𠊎个特別个禮物个十分之一給佢等。所以𠊎對佢等講，佢等在以色列人中做毋得有永久个產業。」
25 上主命令摩西
26 吩咐利未人講：「你等收到上主賜給你等該份以色列人所獻个十分之一个時，愛將其中个十分之一做特別个禮物，獻給上主。
27 這特別个禮物就㧯耕田人拿正收成个五榖㧯新酒來獻个祭共樣。
28 恁樣，你等也愛對以色列人中所收到个十分之一，就係屬上主个特別个禮物中再獻出來。你等愛將這獻給上主个特別个禮物給祭司亞倫，
29 愛對你等得到个收成中將最好个拿出來。
30 你等將最好个部份獻出來以後，做得保留賸到个，就像耕田人獻祭後保留賸到个恁樣。
31 你等㧯你等屋下个人做得在逐所在食該兜賸到个，因為該係你等在聖帳篷工作个代價。
32 你等將最好个部份獻給上主以後，食該賸到个就無罪；總係在最好个部份獻出以前食祭物个，就係打垃圾以色列人个聖物，一定愛處死刑。」