Bible

Numbers 17

Chinese (T) - TNV2012

1 上主對摩西講：

2 「你愛吩咐以色列人給你十二支柺棍仔，對逐支族个領袖拿出一支，頂高愛寫佢自家个名。

3 愛將亞倫个名寫在代表利未个柺棍仔頂，因為逐支族个領袖愛有一支柺棍仔。

4 你愛將這十二支柺棍仔帶到聖帳篷，放在約櫃頭前，就係𠊎㧯你等相會个所在。

5 𠊎所揀選該人个柺棍仔會生芽。恁樣，𠊎會使以色列人埋怨你等个話消掉，無俾𠊎再聽到。」

6 所以，摩西吩咐以色列人逐支族个領袖給佢一支柺棍仔，總共十二枝；亞倫个柺棍仔㧯其他人个柺棍仔全部放共下。

7 摩西將所有个柺棍仔放入聖帳篷，在約櫃个頭前、上主个面前。

8 第二日，摩西到約櫃个聖帳篷底背去，看到該代表利未支族亞倫个柺棍仔已經生芽、生花苞、又開花、結出个杏仁已經熟了！

9 摩西就將所有个柺棍仔對上主面前拿出來，給以色列人看；佢等全部有看到。各領袖將自家个柺棍仔拿轉去。

10 上主對摩西講：「將亞倫个柺棍仔放轉約櫃頭前，愛保存這支柺棍仔，來警告悖逆个人，使佢等毋敢繼續埋怨𠊎，免得佢等死掉。」

11 摩西就照上主个命令去做。

12 以色列人對摩西講：「𠊎等該死了，𠊎等慘了！

13 麼人接近上主个聖帳篷，麼人就會死。恁樣，𠊎等定著會死淨淨了！」