Numbers 16
3 佢等聚集反對摩西㧯亞倫，對佢等講：「你等忒過份了！全會眾逐儕係聖潔个；上主也㧯𠊎等大家同在。你等做麼介看重自家，超過上主个會眾呢？」
4 摩西聽到這話就伏在地上祈禱。
5 然後佢對可拉㧯跈佢个人講：「天光朝晨，上主愛指示𠊎等，麼人係屬佢个，麼人係聖潔个；佢愛喊屬佢个人，就係佢所揀選个，在祭壇接近佢。
8 摩西繼續對可拉講：「你這兜利未人，聽𠊎講！
9 以色列个上帝將你等對會眾當中分別出來，使你等做得接近佢，在上主个聖帳篷工作，又企在會眾面前服事佢等。你等認為這係小可事情嗎？
10 佢俾你等㧯其他个利未人做得接近佢，你等還想愛得到祭司个職位，係麼？
11 你等埋怨亞倫，其實，你等㧯你等个同黨係在背叛上主！」
12 摩西派人去喊以利押个孻仔大坍㧯亞比蘭，總係佢等講：「𠊎等毋去！
13 你𢱋𠊎等離開流乳㧯蜜當肥个埃及，害𠊎等死在曠野，這還毋罅係麼？你還愛抓權來管𠊎等噢！
14 你並無𢱋𠊎等去到流乳㧯蜜當肥个土地，也無給𠊎等田地㧯葡萄園做𠊎等个產業。你敢愛欺騙這兜人嗎？𠊎等毋去！」
15 摩西就大發譴。佢對上主講：「求你毋好接受這兜人个祭物。𠊎無害過佢等一個人，也毋識搶過佢等一隻驢仔。」
16 摩西對可拉講：「天光日你㧯跈你个兩百五十儕，全部愛到上主个聖帳篷來；亞倫也愛到該位。
17 你等逐儕愛拿自家个香爐，底背裝等香，將它帶到上主个面前。」
18 所以佢等逐儕帶等香爐來，底背裝𤏸等个火炭火㧯香，跈摩西㧯亞倫，共下企在聖帳篷門口。
19 可拉聚集全會眾在聖帳篷門口，面對摩西㧯亞倫企等。忽然間，上主个榮光向全會眾顯現。
20 上主對摩西㧯亞倫講：
21 「你等企開，離這兜人較遠兜仔！𠊎即時愛消滅佢等。」
22 總係，摩西㧯亞倫伏在地上，講：「上帝啊，你係所有生命个源頭。一個人犯罪，你就向全會眾發譴係麼？」
23 上主就對摩西講：
24 「你㧯人民講，喊佢等遠遠離開可拉、大坍㧯亞比蘭个帳篷。」
25 摩西企䟘起來，去到大坍㧯亞比蘭該位；以色列該兜長老也跈佢去。
26 佢吩咐人民講：「你等離開這兜壞人个帳篷，毋好摸佢等个東西。若係你等毋聽，你等就會因為佢等个罪㧯佢等共下消滅。」
27 所以佢等離開可拉、大坍㧯亞比蘭个帳篷。大坍㧯亞比蘭帶等𡜵娘子女出來，企在佢等个帳篷門口。
28 摩西對人民講：「你等就會知，係上主派𠊎做這兜事，毋係𠊎自家愛恁樣對付佢等。
29 若係這兜人還係像一般人恁樣死，無受到刑罰，就係表示上主無派𠊎來。
30 總係，上主若做一件從來吂識聽過个事，俾地裂開，吞掉這兜人㧯佢等所有个東西，使佢等生生跌落陰間，你等就知係這兜人藐視上主。」
31 摩西正講煞，大坍㧯亞比蘭腳下个地就裂開，
32 將佢等㧯佢等屋下个人，並所有跈可拉个人㧯佢等个東西，全部吞掉。
33 佢等生生㧯佢等个東西共下跌落陰間。地在佢等頂高又合起來，佢等就毋見掉。
34 所有在場个以色列人聽到佢等大噭，就全部逃走，喊等講：「遽遽走！驚怕地也會吞滅𠊎等！」
35 接等，有火對上主面前出來，消滅該獻香个兩百五十儕。
36 上主對摩西講：
37 「你去㧯祭司亞倫个孻仔以利亞撒講，喊佢將該兜被火燒死个人所留下來个香爐拿走，將香爐肚个火炭火委在別个所在，因為香爐係聖个。
38 香爐獻在上主面前个時，就成做聖个。所以愛將該兜該死个罪人个香爐拿走，打造薄片，為祭壇做一個蓋仔。它愛做以色列人个警戒。」
39 所以祭司以利亞撒將該兜被火燒死个人所獻个銅香爐拿來，打造薄片，為祭壇做一個蓋仔。
40 這係愛警戒以色列人，若毋係亞倫个後代，絕對做毋得來到上主个面前燒香；違犯个人，就會像可拉㧯跈佢个人共樣。這事係照上主通過摩西命令以利亞撒辦个。
41 第二日，以色列全會眾埋怨摩西㧯亞倫講：「你等㓾死上主个子民了。」
42 佢等聚集怪怨摩西㧯亞倫以後，轉身向聖帳篷。佢等看到雲遮等聖帳篷；有上主个榮光出現。
43 摩西㧯亞倫到聖帳篷頭前企等；
44 上主吩咐摩西講：
45 「離這兜人較遠兜仔，𠊎即時愛消滅佢等！」佢兩儕伏在地上；
46 摩西對亞倫講：「拿你个香爐來，將祭壇頂个火炭火放在底背，再放一些仔香在火頂高，遽遽帶到人民該位，為佢等贖罪。遽遽去！上主已經發譴，人民開始發瘟了。」
47 亞倫聽從摩西个話，帶等香爐走入聚集个人群當中。佢看到瘟仔已經發作，就將香放在火炭火頂高，為人民贖罪。
48 佢企在生人㧯死人當中，瘟仔就停下來。
49 除了因為可拉造反死掉个人以外，這擺因為發瘟死掉个總共有一萬四千七百人。
50 發瘟停下來以後，亞倫轉到聖帳篷門口摩西該位。