Bible

3 有三點鐘久，佢等企等聽上主—佢等上帝个法律；接等个三點鐘久，佢等認罪、敬拜上主—佢等个上帝。 4 有一隻講臺係為利未人設个，頂高企等耶書亞、巴尼、甲篾、示巴尼、布尼、示利比、巴尼㧯基拿尼。佢等大聲向上主—佢等个上帝祈禱。 5 然後利未人耶書亞、甲篾、巴尼、哈沙尼、示利比、荷第雅、示巴尼㧯比他希雅為開始敬拜宣告講：愛企起來，讚美上主—你等个上帝；愛永永遠遠頌讚佢！佢个名應當受尊重，超過所有个頌讚㧯讚美；你等愛讚美佢榮光个名。 6 接等，以色列人恁樣祈禱：上主啊，只有你係上主！你創造天㧯天頂个星仔；你造地㧯當中所有个，海㧯當中个生物；你賜生命給萬物。天軍全部敬拜你。 7 你係上主，係揀選亞伯蘭个上帝；你帶佢出巴比倫个吾珥，將佢个名改做亞伯拉罕。 8 你知佢對你忠心，就㧯佢立約：愛將迦南人、赫人、亞摩利人个土地，比利洗人、耶布斯人、革迦撒人个土地，賜給佢个後代。你遵守你个約定，因為你係公義个。 9 你看到𠊎等祖先在埃及受苦；你聽到佢等在紅海滣喊救命。 10 你就行神蹟奇事責罰埃及王，並佢所有个官員㧯全國人民；因為你知佢等欺負你个子民。所以你个名聲傳遍直到今晡日。 11 你為你个子民將海分開，帶領佢等行燥地過去。你將追佢等个人㧹入深水，就像石頭沈落大海个底肚。 12 日時頭，你用雲柱帶領佢等；暗晡頭，你用火柱照光佢等个路。 13 你對天頂臨在西奈山，㧯你个子民講話。你給佢等正直个典章、真實个法律，美好个教訓㧯誡命。 14 你愛佢等守你个安息日做聖日；你通過你个僕人摩西頒佈法律誡命。 15 佢等肚飢个時，你對天頂降下食物；佢等嘴燥个時，你對磐石爆水出來。你吩咐佢等入去佔領，你應許賜給佢等个土地。 16 總係𠊎等个祖先越來越驕傲，越來越硬頸，毋肯遵守你个誡命。 17 佢等毋肯順從，毋記得你所做个一切；佢等毋記得你所行个神蹟。佢等存心悖逆，選一個領袖，愛帶佢等倒轉去埃及做奴才。總係你係赦免个上帝；你有恩典㧯憐憫；你無隨便發譴，有豐盛个慈愛。你無㧒掉佢等。 18 佢等鑄造一隻牛型个偶像，講這就係帶佢等出埃及个神！佢等大大惹起你个怒氣！ 19 總係你無將佢等㧒在曠野，因為你大有憐憫。日時頭帶領佢等个雲柱無離開佢等；暗晡頭照亮佢等个火柱，你也無徙走。 20 你賞賜良善个靈指導佢等；又賜嗎哪給佢等食，也給佢等水啉。 21 在曠野四十年，你供給佢等所需要个一切。佢等个衫褲無著爛掉；佢等个腳也無行起皰。 22 你將列國賜給佢等，佔佢等附近个土地。佢等佔領西宏王統治个希實本，噩王統治个巴珊。 23 你賜佢等子孫，多到像天頂个星仔。又使佢等得到這地，住在這位，就係你應許賜給佢等祖先个土地。 24 佢等佔領迦南个土地；你有壓制該地个人民。你賜能力給你个子民，俾佢等照自家个意思對待迦南地个王㧯人民。 25 堅固个城市、盡肥个土地、裝滿財寶个屋仔、挖好个水井、橄欖樹、果樹、㧯葡萄園、全部落在佢等个手中。佢等食到飽𩜰𩜰，緊大箍起來；你賜个豐盛，使佢等滿足快樂。 26 總係，你个子民卻悖逆你，毋順從你；毋搭你个法律。先知勸佢等轉向你，反轉被佢等㓾死。佢等一擺又一擺侮辱你； 27 你就將佢等交在敵人手中，敵人就欺負佢等。佢等堵到災難个時向你求喊，你就對天頂答應佢等。你大有憐憫，給佢等拯救者，救佢等脫離敵人个手。 28 佢等得平安以後，又在你面前犯罪，你就將佢等再一擺交給仇敵管。總係佢等悔改、向你求喊个時，你在天頂聽到，你大有憐憫，還係一擺又一擺拯救佢等。 29 你警告佢等愛遵守你个法律，總係佢等驕傲，毋聽你个命令。遵守你个法律正係生命个路，佢等還係硬頸斡頭毋肯聽。 30 你忍耐警告佢等盡多年，你个靈感動先知向佢等講話，總係你个子民還係耳公背背，所以你由在別國來佔領佢等。 31 雖然恁樣，因為你大有憐憫，你無㧒掉佢等，也無毀滅佢等；因為你係有恩典憐憫个上帝！ 32 𠊎等个上帝啊，你係偉大个上帝，你值得敬畏，有大權柄！你信守約定，永遠慈悲。對亞述列王壓迫𠊎等到這下，𠊎等个王，𠊎等个領袖，𠊎等个祭司，𠊎等个先知，𠊎等个祖先㧯所有人民，𠊎等全部受盡痛苦！求你毋好毋記得𠊎等受過恁多个苦難！ 33 你對𠊎等所做个係公義个，你所行个係信實个，總係𠊎等所做个係邪惡个。 34 𠊎等个祖先、君王、領袖㧯祭司，全部無遵守你个法律，毋聽你个命令㧯警告。 35 你个子民該時住在自家个國家，在你所賜盡大盡肥个土地享福，總係佢等無離開罪惡來事奉你。 36 看哪，𠊎等這下在你賜給𠊎等祖先个土地做奴才，在這供給𠊎等食物个好土地做別人个奴才。 37 這地个出產全部歸你派來管𠊎等个君王，因為𠊎等有犯罪。佢等隨意對待𠊎等个身體㧯頭牲，𠊎等非常痛苦！ 38 因為所發生个這兜事，𠊎等以色列人民就在這位簽一個確實个約。𠊎等个領袖、利未人㧯祭司全部簽名。