Nehemiah 8
1 到第七月，以色列人在逐儕个城鎮全部安定好勢。該隻月个第一日，佢等聚集在耶路撒冷，在水門前个廣場。佢等請經學專家以斯拉將法律書帶來；這法律就係上主通過摩西給以色列人个。
2 所以祭司以斯拉將法律書帶到群眾聚集个所在；該位有男人、女人、㧯聽得識个細人仔。
3 以斯拉在水門前个廣場向佢等大聲讀法律書，對天光一直讀到當晝；佢等全部當認真聽。
4 經學專家以斯拉企在為這事特別做个樹臺頂。佢右片企等瑪他提雅、示瑪、亞奈雅、烏利亞、希勒家㧯瑪西雅；佢左片企等比大雅、米沙利、瑪基雅、哈順、哈拔大拿、撒迦利亞㧯米書蘭。
5 以斯拉高高企在臺頂，佢等全部注意看佢。佢一打開書，大家全部企起來。
6 以斯拉講：「頌讚上主；佢係偉大个上帝！」所有民眾全部擎手，應講：「阿愐！阿愐！」然後跪下，面伏在地上敬拜上主。
7 後來，民眾䟘起來，企在佢等原來个所在；有兜利未人就向佢等解釋法律。這兜人係耶書亞、巴尼、示利比、雅憫、亞谷、沙比太、荷第雅、瑪西雅、基利他、亞撒利雅、約撒拔、哈難，㧯比萊雅。
8 佢等宣讀上帝个法律書，然後翻譯，並詳細解釋，使民眾明白。
9 民眾聽到法律規定个事以後，全部感動到噭出來。所以省長尼希米、祭司㧯經學專家以斯拉，並解釋法律个利未人㧯民眾講：「今晡日係上主—你等上帝个聖日，你等毋好悲傷噭吱。
10 大家轉屋下去準備筵席！將你等个食物㧯酒分給無能力預備个人。今晡日係𠊎等个主个聖日；你等毋好憂愁，因為上主个喜樂就係你等个力量。」
11 利未人在民眾當中安慰佢等，喊佢等恬恬，毋好悲傷，因為這日係聖日。
12 民眾就轉屋下去，快樂啉食，又㧯別人分享自家有个，因為讀給佢等聽个法律，佢等有聽入耳。
13 第二日，逐宗族个族長、祭司㧯利未人，共下去經學專家以斯拉該位研究法律个教訓。
14 佢等發現，上主通過摩西賜下這法律，識命令以色列人在第七月搭寮仔節个時，愛住在臨時搭个寮仔肚。
15 所以，佢等向全耶路撒冷㧯其他个城鎮發出通知：「你等愛出去，到山頂剁橄欖樹、松樹、石榴樹、棕樹㧯其他樹仔个樹桍，照法律書个指示搭寮仔。」
16 民眾就出去，剁來盡多樹桍，搭寮仔在佢等个屋頂項，在佢等个庭院肚，在上帝聖殿个庭院肚，在水門㧯以法蓮門前个廣場。
17 所有流亡轉來个人全部搭寮仔，住在底背。對嫩个孻仔約書亞个時代以來，這係以色列人第一擺恁樣做。逐儕就當歡喜快樂。
18 對節期个第一日到盡尾一日，以斯拉逐日讀一段上帝个法律書給佢等聽。佢等守節七日，到第八日，就照法律个規定舉行閉會典禮。