Job 28
1 銀有生產个礦場；金有提煉个所在。
2 人對地泥下挖出鐵，也對石頭肚提煉銅。
3 人走到最暗个所在去採礦，佢到地層盡深个所在去尋，愛對烏暗中將礦石挖出來。
4 佢就在無人住个地方開礦；在罕得有人到个所在工作，在礦坑底背吊等搖來搖去。
5 地面出產糧食，地底下卻熱到像火爐。
6 石頭肚囥等藍寶石，地泥下有金沙。
7 鷹鳥毋知入礦場个路；鷂婆个目珠也無看過。
8 兇惡个野獸毋識踏過，兇猛个獅仔也毋識經過。
9 人鑿開盡硬个石頭，將歸隻山揙轉來。
10 佢在巖石當中挖山窿，發現窿肚逐樣个寶石。
11 佢將水源頭堵等，使寶藏顯露出來。
12 總係，愛去㖠位尋智慧呢？去㖠位正學得到聰明呢？
13 智慧个價值無人知，在世間無人尋得到。
14 深淵講：智慧無在𠊎這位；大海講：智慧無㧯𠊎共下。
15 金仔買毋到智慧；較多个銀仔也換毋到。
16 純金㧯貴重个珠寶，共樣也㧯它比毋得。
17 黃金㧯寶玉無辦法㧯它比；純金个器皿也換毋到。
18 智慧个價值贏過珊瑚㧯水晶；有智慧遠遠超過得到紅寶石。
19 古實个黃玉㧯它个價值比毋得；最純个金仔也無法度㧯它比價。
20 恁樣，智慧个源頭在㖠位？去㖠位正學得到聰明呢？
21 動物个目珠看毋到它；空中个飛鳥也看毋到。
22 就算毀滅㧯死亡也承認，只有聽過它个風聲定定。
23 單單上帝知該條路，知愛去㖠位尋智慧；
24 因為佢个目珠看得到地極，佢查看普天下个萬事萬物。
25 上帝賜威力給風，為大海決定水量，
26 規定落雨个時節，定響雷公个路線，
27 該時佢看到智慧，測量它，堅定它，又鑒察它个價值。
28 上帝向世間人講：「敬畏上主就係智慧；離開邪惡就係聰明。」