Job 27
1 約伯接等又講：
2 上帝無用公當對待𠊎；全能者使𠊎心中艱苦。𠊎指等永生个上帝發誓：
3 當𠊎个命還在，上帝給𠊎還有一口氣，
4 𠊎个嘴唇絕對毋講白賊，𠊎个舌乸絕對毋講花撩。
5 𠊎絕對毋承認你等有理；𠊎到死乜愛堅持𠊎無罪。
6 𠊎確信自家無毋著，毋會放掉這立場；𠊎還在世間个日仔，𠊎堅持良心清白。
7 願𠊎个敵人堵到壞人應該受个報應；願攻擊𠊎个像不義个人恁樣受刑罰。
8 毋敬畏上帝个人有麼介好希望呢？上帝愛收佢个命，佢還有麼介盼望？
9 災難臨到佢身上个時，上帝敢愛聽佢个求喊？
10 佢敢會因為全能者來喜樂？佢敢會常常向上帝來祈禱？
11 𠊎愛指教你等上帝个權能有幾大；𠊎也愛㧯你等說明全能者个旨意。
12 你等逐儕敢毋係全部看過嗎！做麼介緊講無搭無碓个話呢？(瑣法講：)
13 上帝給壞人所定个命運，全能者愛刑罰殘暴个人，就係恁樣：
14 佢就算有盡多孻仔，逐個也會被人㓾死；佢个子孫也會食毋飽。
15 該兜賸到个人會發瘟死掉；佢等个寡婦也毋會為佢等噭。
16 壞人雖然銀仔多到算毋出，又還有著毋掉恁多个衫褲，
17 總係義人愛來著佢个衫褲，無罪个人愛來分佢个銀仔。
18 壞人个屋像鳥藪無堅固，也像奴才守望用个茅寮。
19 總有一日，去睡个時還當發，睡醒个時，佢个財富就無了。
20 得人驚个事像大水逐到佢，大風差在暗晡頭將佢吹走。
21 東風一吹，將佢對屋下吹走。
22 狂風愛攻擊佢，全無留情；佢拚命走，想愛走出風差个範圍。
23 人愛拍手來嘲謔佢，出聲逐佢離開本地。