Bible

1 約伯應講： 2 你對𠊎這無能个人幫助還多噢！𠊎這手骨無力个人，你還肯拯救！ 3 像𠊎恁無智慧个人，你還給𠊎恁寶貴个指教！ 4 總係你想，有麼人會聽你个話？到底麼人感動你講恁樣个話？(比勒達講：) 5 在地底下个深水中，死人个陰魂愊愊掣。 6 陰間在上帝面前顯明；地獄也無辦法遮得住。 7 上帝鋪設北極个天空，將地球掛在太空當中。 8 上帝囤水在烏雲當中，雲無因為水重就裂掉。 9 佢將雲鋪設在月光个面頂，用雲將歸隻月光遮到密密。 10 佢在海面畫地平線，成做光㧯暗个界限。 11 佢一指責天个柱仔，它兜就驚到緊顫。 12 佢用大能使大海平靜下來，佢用聰明打碎海怪拉哈伯。 13 佢歕一口氣，雲就開、天就清；佢个手㓾掉走當遽个海蛇。 14 看哪，這兜係上帝工作个一部份，𠊎等只有聽到佢當細个聲定定。佢大能个雷聲麼人能明白呢？