Job 29
1 約伯接等又講：
2 𠊎樣般希望年月會像頭擺恁樣，像過去上帝保守𠊎个年日共樣。
3 該樣時，佢个燈照在𠊎个頭那頂；佢个光帶𠊎行過烏暗。
4 該樣時，𠊎還後生，當強壯；上帝个慈愛庇蔭吾屋下。
5 全能者㧯𠊎共下；𠊎个子女全部圍等𠊎。
6 𠊎所到个地方有食毋掉个乳，連巖石也湧出橄欖油像河壩水恁多。
7 𠊎出去到城門集會个所在，人就在廣場為𠊎預備座位。
8 後生人看到𠊎就讓𠊎先行；老人家看到𠊎全部企起來；
9 領袖講等話也停下來，又用手揞等自家个嘴。
10 連貴族也毋敢講話，全部恬恬無出聲。
11 聽到𠊎个人攏總祝福𠊎，看到𠊎个人全部稱讚𠊎。
12 窮苦人愛𠊎𢯭手，𠊎就幫助；孤兒來求𠊎救濟，𠊎無拒絕。
13 會滅亡个人為𠊎來祝福；𠊎使寡婦个心歡喜唱歌。
14 𠊎將正義準做衫褲來著；公平係𠊎个外衫㧯帽仔。
15 𠊎做瞙目人个目珠；𠊎做跛腳人个腳骨。
16 𠊎做窮人个阿爸；𠊎為生份人伸冤。
17 𠊎毀壞強暴个勢力，救被佢等欺負个人。
18 𠊎想𠊎會好死在屋下；𠊎个歲數會像泥沙恁多。
19 𠊎像樹根伸到水邊，暗晡時有露水滋潤𠊎个枝葉。
20 儕儕都一直稱讚𠊎，𠊎个元氣毋識衰退。
21 人人等候聽𠊎个話，恬恬領受𠊎个教導。
22 𠊎講煞，大家就無話好補充；𠊎个話像雨水落在佢等身項。
23 佢等還盡想愛聽𠊎教導，嘴勺勺像農民盼望春雨。
24 佢等失志个時，𠊎安慰佢等；𠊎用滿面个笑容鼓勵佢等。
25 𠊎做佢等个領袖，決定愛行个路；𠊎帶領佢等，像係君王帶領軍隊，在佢等失望个時，𠊎就安慰佢等。