Bible

1 接等，書亞人比勒達應約伯講： 2 你少講兜話好麼？你安靜下來想，𠊎等正有辦法㧯你講話。 3 你恅到𠊎等像頭牲仔？𠊎等像禽獸恁戇係麼？ 4 你个發譴傷害你自家定定；敢講因為你發譴地會荒掉？上帝應當移山來滿足你嗎？ 5 壞人个光一定會烏掉；佢个火絕對毋會再𤏸。 6 佢帳篷肚个燈定著變暗；掛在頂高个燈也會烏掉。 7 佢穩定个腳步開始搖搖擺擺；佢被自家个詭計絆倒。 8 佢自家陷入羅網肚；佢个腳被網仔纏等。 9 羅網䌈到佢个腳㬹；機關將佢挾到𢫮𢫮。 10 有陷阱埋在地泥下；佢行个路鋪等羅網。 11 恐怖對周圍攻擊佢，步步迫等佢个腳㬹。 12 佢以前好額，這下強強會餓到；災禍一直在佢个身邊等等佢。 13 致命个病痛纏身；佢个手腳糜糜酪酪。 14 佢對安居个帳篷肚被人拖出來，然後被人帶到陰間个王該位去。 15 佢个帳篷用硫磺消毒，然後就交給別人去住。 16 佢下背个樹根枯燥；佢頂高个枝葉燥掉。 17 地上無人會記得佢；同胞毋記得佢个名。 18 佢愛對世間被逐出去，對光明中被逐入烏暗。 19 佢在本族中無子無孫；佢住个所在無留半儕。 20 西方个人聽到佢个命運感覺著驚；東方个人知佢所堵到个就嚇倒。 21 這就係壞人个結局；毋敬畏上帝个人最尾就係恁樣。