Bible

1 𠊎會死了，會斷氣了；墳墓已經為𠊎準備好了。 2 逐所在有人嘲謔𠊎；𠊎歸日被佢等㩢耍。 3 上帝啊，求你來做𠊎个保證人；你以外，無別人肯證明𠊎个話。 4 你使佢等个理性無掉去；求你毋好俾佢等贏過𠊎。 5 古人講：為金錢出賣朋友个人，佢个子孫會受到連累。 6 這下佢等拿這句話來攻擊𠊎；佢等呸口潾在𠊎个面項。 7 悲傷險險害𠊎變做瞙目；𠊎个身體瘦到像一支骨。 8 恅到自家正直个人全部驚到；佢等責備𠊎無敬虔。 9 恅到自家高尚个人越有信心；恅到自家清白个人越有勇氣。 10 總係俾佢等全部來企在𠊎面前；𠊎一定尋毋出有一個賢明个人。 11 𠊎个日仔過去，計劃失敗；𠊎个希望也已經無掉去。 12 𠊎該兜朋友將暗晡頭看做日時頭；佢等講光明近了，其實還係烏暗。 13 𠊎惟一个盼望係落陰間，在該位个烏暗中睡長覺。 14 𠊎愛喊墳墓做阿爸，喊屍蟲做阿姆、抑係姊妹。 15 𠊎个希望在㖠位呢？麼人看出𠊎有希望？ 16 𠊎落陰間个時節，「希望」會共下去麼？